Komisaun Rekrutamentu Públika Ona Naran Kandidatura ba Membru F-FDTL

by -3.328 views
Imajen ne’e hatudu Xefe Estadu Maior, Brigadeiru Jeneral FALINTIL Forsa Defeza Timor-Leste (F-FDTL), Calisto Santos "Coliati" hala’o konferénsia ba imprensa iha Kuartel Jeral Fatuhada, Dili. Foto TP: Jaime Pires

Jornalista Jaime Pires / Editór Noémio Falcão

DILI (Timor Post)—Xefe Estadu Maior, Brigadeiru Jeneral FALINTIL Forsa Defeza Timor-Leste (F-FDTL), Calisto Santos “Coliati” informa, nia parte públika tiha ona naran ba kandidatu membru foun, ohin, Kuarta (15/09/2021).

Lihusi konferénsia ba imprensa iha Kuartel Jeneral F-FDTL, Fatuhada, Dili, Coliati hatete, komisaun rekrutamentu públika de’it naran kandidatu sira ne’ebé liu teste médiku, eskrita, oral no fíziku iha instrusaun Komandante Nicolau Lobato, Metinaro, Dili.

“Ida-idak hakbesik-an ba sira nia munisípiu hodi haree ita boot sira nia naran,” Coliati dehan.

Coliati subliña, komisaun taka sai lista naran iha Administrasaun Munisípiu, Komandu Polísia Munisípal no Sede Konsellu Kombate Libertasaun Nasionál sira hotu.

Ba kadetes ne’ebé mak naran sai tenke mai aprezenta an imidiata tuir Munisípiu hodi rona orentasaun.

Loron kuarta Feira (22/09) kadetes foun sira husi Munisípiu Dili, Likísa, Bobonaru, Ermera, Aileu, Manatutu no Baukau, sei mai aprezenta an iha Kuartel Jeneral F-FDTL Fatuhada tuku sia dadeer.

Ba sira husi Munisípiu sira hanesan, Lautém, Vikeke, Manufahi, Ainaru, Kovalima no Oe-Kusi, sei mai aprezenta an iha loron kinta Feira (23/09) oras hanesan tuku sia dadeer.

No More Posts Available.

No more pages to load.