Komandu PNTL nia Pozisaun Kona-ba Rekrutamentu Membru Foun

by -1.316 views
Komadante Jerál Polísia Nasionál Timor-Leste (PNTL), Komisáriu Faustino da Costa. Foto Midia PNTL

Jornalista Jaime Pires / Editór Noémio Falcão

DILI (Timor Post)—Komadante Jerál Polísia Nasionál Timor-Leste (PNTL), Komisáriu Faustino da Costa, simu ona despaixu husi Ministeriu Defeza, kona-ba atu halo rekrutamentu ba membru foun hamutuk ho FALINTIL-Forsa Defeza Timor-Leste (F-FDTL) iha tinan oin.

Faustino dehan, nia parte simu ona despaixu hodi halo rekrutamentu konjutu.

“Ha’u hanoin ida ne’e, PNTL mós simu ona despaixu husi Ministeriu Defeza no Interior mós, ne’ebé ekipa konjunta ida mak sei halo ida ne’e,” Faustino ba Jornalista sira iha Kuartel Jerál PNTL, Kaikoli Tersa (19/10/2021).

“Maibé ita hein katak orsamentu ba ida ne’e iha, atu nune’e ekipa konjunta ne’ebé mak forma husi parte Ministeriu Defeza no Ministeriu Interior halo servisu,” Faustino subliña.

Nia hatete, membru foun ba PNTL, komandu propoin rekruta foinsa’e to’o 700.

Fó hanoin fali katak, antes ne’e Ministru Defeza (MD), Filomeno Paixão de Jesus hatete, diskuti ona assuntu ne’e ho Primeiru Ministru Taur Matan Ruak hanesan mos Ministru Interior.

Filomeno subliña, halo rekrutamentu dala ida atu nune’e membru foun sira bele aprende kursu hamutuk durante fulan ida ka rua, hafoin bele fahe fali balun ba Polísia no balun iha Forsa.

“Tanba ita haree iha tinan kotuk liubá ne’e ita haree hanesan forsa rua ne’e iha kompetisaun fali no balun halo konflitu ba malu, entaun ita hakarak habadak no durante tempu badak ita hakarak sira hamutuk nune’e mós sira bele koñese malu,” Filomeno salienta.

Tuir planu, rekrutamentu ba forsa foun hamutuk 600.

No More Posts Available.

No more pages to load.