Koligasaun Foun Konvoka Reuniaun iha Rezidénsia Primeiru Ministru Indizitadu Xanana Gusmão

by -15 views

DILI—Koligasaun foun ne’ebé forma husi Partidu CNRT, PD, KHUNTO, UDT, FM ho PUDD konvoka reuniaun iha rejidénsia Primeiru Ministru Indizitadu ba governu dasia Kayrala Xanana Gusmao, iha Lecidere, Dili.

Reuniaun ne’ebé hala’o iha loron Domingu (05/04/2020) ne’e hahú iha oras, tuku 16:00 to’o tuku 19:00 seidauk hotu.

Fonte kredivel Timor Post informa, reuniaun ne’e diskuti kona-ba situasaun polítika rai laran, COVID-19 no ezonerasaun Vise Ministra Kuidadu Saúde Primária, Élia Antonia dos Reis Amaral.

Fonte ne’e dehan posibilidade boot partidu CNRT ho KHUNTO sei retira nia membru governu iha governu daualu lideradu Primeiru Ministru Demisionáriu Taur Matan Ruak.

“Posibilidade koligasaun foun sei prosesa mós mosaun sensura hasoru Primeiru Ministru Taur Matan Ruak tanba konsidera laiha kapasidade,” fonte ne’e salienta.

Partisipa iha reuniaun ne’e, Ministra Finansas Interina Sara Lobo Brites, Ministru Defeza no Seguransa no Ministru Interior Interinu, Filomeno Paixao, Vise Ministra Saúde Elia Antonia dos Reis Amaral, Ministru Negosiu Estranjeiru no Koperasaun, Deoniso Babo Soares, Prezidente Pralementu Nasionál, Arão Noe, Xefe Bankada PD, António da Conceição,  Líder KHUNTO, UDT, FM no PUDD.

Timor Post sei kontinua iha terrenu hodi akompaña rejultadu final husi reuniaun ne’e. (jry/cao)