KM Nomeia Ruben Freitas ba Prezidente ANE I.P

husi -40 views

Timor Post (27/01/2021)-Ministru Prezidensiál Konsellu Ministru, Fidelis Magalhães ba jornalista sira iha Palasiu Governu, kuarta (27/01), informa, Konsellu Ministru (KM) nomeia Ruben Jerónimo Freitas ba prezidente Konsellu Administrasaun Autoridade Nasionál Eletrisidade (ANE I.P).

 Fidelis dehan, proposta deliberasaun hodi nomeia Ruben Jerónimo Freitas ne’e, aprezenta hosi Ministru Obras Públika, Salvador Pires.

“Ministru Obras Públika, delibera ona nomeia hanesan membru sira konsellu administrasaun autoridade nasionál eletrisidade (ANE I.P) nia,  ba mandatu tinan haat (2021-2025)”, dehan Fidelis.

Entretantu kompozisaun estrutura ANE I.P maka Ruben Freitas, hanesan prezidente konsellu administrasaun, Jaime Godinho Soares, hanesan Vise-Prezidente no Aurora Teresa Carvalho Magno, Junior Raimundo da Cruz no José Maria Xavier, hanesan vogál.

 Fidelis hatutan Ministru Obras Públika, Salvador Pires mós, nomeia membru sira Konsellu Administrasaun Autoridade Nasionál Bee No Saneamentu (ANAS I.P) ba períodu tinan haat nian.

Iha ne’e nomeia Domingos Pinto, hanesan Prezidente Konsellu Administrasaun, Francisco Xavier Pereira, nu’udar Vise-Prezidente no Miguel Antonio Ximenes, Dulce Soares no Eugenio Lemos, sai hanesan vogal.(Jornalista: Jaime Pires, Editor: Mariano Martins)