KM Nomeia Eusébio Freitas Ba Prezidente AACTL

by -225 views

Timor Post (02/09/2020)- Konsellu Ministru hala’o reuniaun iha Palasiu Governu, kuarta (02/09) nomeia Eusébio Freitas ba kargu Prezidente foun Konsellu Administrasaun Autoridade Aviasaun Sivíl Timor-Leste (AACTL).

“Konsellu Ministru aprova halo nomeasaun Eusébio Freitas ba Prezidente Konsellu Administrasaun Autoridade Aviasaun Sivíl Timor-Leste (AACTL), nia ba períodu tinan 2020 to’o 2024”, informa Ministru Prezidensiál Konsellu Ministru Fidelis Leite Magalhães ba jornalista sira iha Palasiu Governu, kuarta (02/09).

Portavoz Governu akresenta proposta rezolusaun ne’e aprezenta hosi Ministru Transporte no Komunikasaun José Agostinho da Silva no Konsellu ministru mós ezonera membru anterior Konsellu Administrasaun AACTL ne’ebé antes ne’e lidera hosi Ana Rosália Ximenes Varela.

Enkuantu ba kargu vogal sira konsellu administrasaun AACTL nian Fidelis haktuir hirak ne’e nomeia Domingos Savio de Jesus Sarmento, liuhosi proposta Ministériu Transporte no Komunikasaun no Geovanio Henrique liu hosi proposta Ministériu Finansas.

Entertantu Ministru nia dehan estrutura órgaun ne’e nian troka atu aviasaun sivil iha timor bele la’o ho di’ak liután no atu garante funsionamentu sistema transporte aéreu.(Jornalista: Jaime Pires)

No More Posts Available.

No more pages to load.