KM Aprova Dekretu Lei ba Programa Uma Kbiit Laek

by -268 views
Reuniaun Konsellu Ministru

(Reportajen Jaime Pires/Editor Mateus da Cruz)

DILI (Timor Post)- Reuniaun Konsellu Ministru (KM) extraordinariu, ne’ebé mak realiza iha Palásiu Governu ohin, aprova projetu dekretu lei ba Uma Kbiit Laek (UKL) 2022.

“Konsellu Ministru aprova ona projetu Dekretu-Lei ida, ne’ebé aprezenta husi Ministru Administrasaun Estatál, Miguel Pereira de Carvalho, kona- ba programa Uma ba Ema Kbiit Laek Plus (UKL+),” dehan Ministru Prezidensiál Konsellu Ministru, Fidelis Magalhaes, ba jornalista sira iha Palásiu Governu, Segunda (09/05).

Nia esplika, Projetu Dekretu-Lei ida-ne’e hetan ona aprovasaun iha soru mutu Konsellu Ministru iha loron 06 fulan Maiu tinan 2022, maibé tanba alterasaun balun mosu iha faze redasaun finál nian, tenke submete fali ba konsellu ministru atu aprova. Dekretu-Lei ida-ne’e estabelese rejime espesiál aprovizionamentu ne’ebé haree liu ba ezekusaun medida UKL+.

“Ho rejime foun ida ne’e ba oin sei prevee opsaun rua, ida ho atribuisaun subvensaun liuhusi estrutura suku PNDS no ida seluk ho posibilidade atu halo aprovizionamentu sentralizadu hodi bele hetan ekonomia eskala no poupansa ba rekursu ekonómiku,” deklara.

Programa ne’e ho objetivu atu hadi’a kondisaun sira abitalidade husi uma ne’ebé sai nu’udár hela-fatin permanente ba uma-kain sira ne’ebé vulneravel liu, bainhira uma sira ne’e aat hela no uma-kain sira ne’e la iha uma seluk atu hela ba.

“Uma kain ne’ebé vulneravel liu, iha kontestu ezekusaun programa UKL+, maka sira ne’ebé ninia rendimentu médiu loroloron la liu dolar amerikanu $1, 25 no ne’ebé sira-nia uma ne’e aat hela,” nia hatete.

Uma kain ne’ebé vulneravel liu, bele benefisia tuir modalidade apoiu finanseiru ba obra benefisiasaun, konservasaun ka reparasaun husi ninia hela-fatin, to’o valór másimu dolar amerikanu rihun sanulu-resin-tolu.

Nune’e mós Apoiu liuhusi materiál sira konstrusaun nian ba substituisaun materiál sira kobertura no revestimentu husi ninia hela-fatin, to’o valór másimu dolar amerikanu rihun haat.

No More Posts Available.

No more pages to load.