KM Aprova Dekretu Ezekusaun OJE 2021 no Rona Aprezentasaun Planu Vasinasaun hosi MS no OMS

by -503 views

Timor Post (08/01/2021) Sorumutuk Estraordináriu Konsellu Ministrus nian iha loron 8 fulan-janeiru tinan 2021 iha Palásiu Governu,  aprova  projetu Dekretu Governu nian kona-ba ezekusaun Orsamentu Jerál Estadu (OJE) nian ba tinan 2021, ne’ebé aprezenta husi Ministru Finansas, Rui Augusto Gomes.

“Dekretu Governu ida-ne’e hatuur regra sira kona-ba Ezekusaun Orsamentu Jerál Estadu nian ba tinan 2021, ne’ebé hetan aprovasaun husi Lei n.14/2020, loron 29 fulan-Dezembru no aplika ba orsamentu sira ba órgaun no servisu sira husi Administrasaun Sentrál, Rejiaun Administrativa Espesiál Oekusi Ambenu no Seguransa Sosiál” haktuir iha komunikadu Ministru Prezidénsia Konsellu Ministru Fidelis Leite Magalhaes, Sesta (08/01) ne’ebé Timor Post asesu.

Dokumentu ne’e hatutan, Diploma Ministériu finansas nian ida-ne’e fó garantia ba efetivu no rigorozu kontrolu orsamentál no, ba tempu hanesan, hodi simplifika prosedimentu sira ezekusaun orsamentál nian, ne’ebé fó kontinuidade ba mudansa sira ne’ebé hahú ona iha tinan 2020, ho objetivu atu fasilita ezekusaun Orsamentu Jerál Estadu nian ba tinan 2021 husi órgaun no servisu sira Setór Públiku Administrativu nian.

Entre diferensa sira ba Dekretu Governu husi Ezekusaun ba OJE tinan 2020, destaka katak eziste de’it rejime finanseiru rua, inklui implementasaun husi orsamentasaun liuhusi  programa sira, halo aliterasaun ba data husi taka ezersísiu orsamentál, aumenta fleksibilizasaun husi ezekusaun orsamentál no aumentu obrigasaun hodi fahe informasaun kona-ba ezekusaun.

Iha reuniaun estraordináriu ne’e mós parte ikusliu, Ministra Saúde, Odete Maria Freitas Belo no Diretora-Jerál ba Prestasaun Servisu Saúde, Odete Viegas, halo mos aprezentasaun ida kona-ba planu introdusaun vasina KOVID-19 iha Timor-Leste.

Aprezentasaun ne’e konta mós ho intervensaun husi Reprezentante husi Organizasaun Mundiál Saúde (OMS) iha Timor-Leste, Rajesh Pandav.

Durante iha aprezentasaun, esplika ona kona-ba vasina saida maka eziste no vasina saida mak adekuadu liu ba kontestu nasionál, liuliu husi nesesidade sira ba armazenamentu ne’ebé eziste ona iha País.

Parte saúde mós aprezenta  prioridade sira ba kurtu-prazu ba estabelesimentu husi mekanizmu nesesáriu sira ba planeamentu no koordenasaun ba implementasaun efikás vasina nian no ba identifikasaun husi grupu-alvu prioritáriu.

Sei konstitui ekipa téknika inter ministeriál ida ne’ebé sei responsavel ba elaborasaun planu vasinasaun kontra COVID-19 iha Timor-Leste.(***/TP)

No More Posts Available.

No more pages to load.