Klínika Parlamentu Nasional Rejista Pasiente IR 40

by -272 views
Ilustrasaun

DILI (Timor Post)Klínika Parlamentu Nasionál (PN) rejistu pasiente ho moras Infesaun Respiratóriu (IR) hamutuk haat nulu (40), tuir fali mak moras tensaun 14.

Pasiente hirak ne’e deteta hosi deputadu no funsionáriu administrasaun sira iha Parlamentu Nasionál.

Médiku Jerál Klínika Parlamentu Nasionál, Alcino da Silva, hatete tratamentu ba deputadu no funsionáriu administrasaun hahú hosi segunda to’o sesta, entaun númeru hirak ne’e rejistu iha fulan Jullu to’o Setembru 2021.

“Ami halo tratamentu iha parlamentu nasionál komesa segunda too sesta, rejistu moras aas mak infesaun respiratóriu 40 tuir tan mak moras tensaun 14 iha fulan Jullu to’o Setembru”, Alcino informa, ba Timor Post iha Klínika Parlamentu Nasionál, Kuarta (13/10).

Médiku ne’e esplika, moras tensaun moras baze nian, dala-ruma ema moris iha nanis ona, tanba moras tensaun mai hosi jerasaun, nune’e mós belu mosu hosi hahán.

Tanba hahán ne’ebé la favoravel dala-ruma nia bele hetan moras tensaun, entaun presiza halo kontrolu, nune’e bele fó ai-moruk atu konsumu hodi bele hatún tensaun.

“Iha ne’e, ami halo tratamentu tuir klasifikasaun tensaun, identifika todan ita bele fó tratamentu, karik makaas liu ami haruka atu konsulta iha doutór espesialista”, nia dehan.

Daudaun ne’e, deputadu no funsionáriu ne’ebé mak hetan moras tensaun maioria konsulta iha doutór espesialista sira iha klínika DMC.

Alende halo tratamentu iha fulan Agostu total pasiente hamutuk 137 infesaun respiratóriu nafatin aas hamutuk 58 no tuir tan mak moras tensaun 14.

Moras tensaun la’ós atu kura, maibé fó de’it ai-moruk hemu hodi bele normal fali. Enkuantu deputadu sira hetan moras tensaun presiza kuidadu-an.

Tanba moras tensaun bele afeta ba fuan, afeta ba rins nune’e mós komplika ba órgaun sira seluk.

Nia dehan, halakon moras tensaun presiza redús han ho masin, mina nune’e mós presiza halo ezersisu, atu nia valor normal tanba moras ne’e la’ós atu kura kedan.

Tratamentu saúde ba deputadu no funsionáriu administrasaun iha fulan Setembru hamutuk 120. Infesaun respiratóriu mantein númeru aas hamutuk 38 no tuir tan mak moras tensaun nafatin ba númeru 14.

Aleinde ne’e mós, nia dehan klínika Parlamentu Nasionál la’ós deteta moras inspesaun respiratóriu ho moras tensaun, maibé deteta mós moras sira seluk hanesan moras diária, moras kulit no moras ruin, ne’ebé ho númeru ki’ik.(kyt)

No More Posts Available.

No more pages to load.