Klínika Bairro-Pité Rejista Pasiente TBC Hamutuk 86, Teste Espesiál

by -249 views
Ilustrasaun

DILI (Timor Post)—Xefe Administrasaun Klínika Bairru Pité (KBP) Lino Âlvaro, haktuir, durante fulan tolu hahu husi Agostu to’o Outubru 2021 pasiente moras Tuberkulozu (TBC) ne’ebé halo tratamentu hamutuk tolu-nulu-resin-lima (35).

Nia parte rejista fulan Agostu pasiente na’in-25, iha Setembru na’in-26 no fulan Outubru nian pasiente na’in-35 ne’e no sira ne’ebé hala’o hela tratamentu iha KBP, sira ne’ebé mak moras grave liu no sira balun transfere ba halo tratamentu iha Tibar.

“Ami sei kria kondisaun di’ak hodi halo tratamentu ba pasiente sira ne’ebé pozitivu moras TBC, sira hetan tratamentu ne’ebé mak di’ak, sira nia kondisaun saúde rekupera no sira bele fila-fali nia uma,” Lino informa ba Timor Post, iha nia knaar fatin Bairru Pité, Tersa (19/10).

Pasiente sira ne’e, nia dehan, konsumu ai-moruk ne’e ho rútina, laiha pasiente ida mak husik abandona, tenke kontaktu no konfirma sira hodi bele hetan tratamentu ne’ebé dignu no bele responde ba moras ne’ebé mak afeta hela ba ninia isin.

Portantu, moras TBC ne’e kauza hosi buat barak hanesan mear, iis boot no moras seluk tan ne’ebé iha ba hotu iha ne’ebá, ikus mai tenke halo teste laboratóriu ka teste PCR hodi deteta katak pasiente ne’e pozitivu ba moras TBC ka moras seluk.

“Sé iha alternativu ba ita atu prevene-an hosi moras TBC, bainhira ita pozitivu ona ba moras TBC, tenke buka informasaun no hakbesik-an ba iha sentru saúde ne’ebé mak besik, atu nune’e labele da’et ba ita nia komunidade no Família ne’ebé ita hela hamutuk ba”, nia subliña.

Moras TBC ne’e la haree ba iha idade, hanesan mensiona ne’e, moras hanesan mear, iis boot no moras seluk tan, moras ne’e bele afeta ema boot no labarik sira hotu.

“Ita haree lai ba sira nia kondisaun, depois ita halo tratamentu, tenke fó reseita ka ai-moruk haree ba nia grau, sé labarik sira bele konsumu, maibé haree tuir estandarte labarik ninian, sé ema boot tenke fó tuir ema boot, tanba ema boot ne’e difisil tebes atu kura moras ne’ebé afeta hela iha sira nia isin”, nia hatutan.

Iha fatin hanesan, asuntu Tuberkuloza (TBC), Lucilda Rosa, informa tipu-tipu ai-moruk ne’ebé atu kura moras tuberkulozu mak hanesan Zona Zidas 300 mg, Prifin 150 mg no seluk tan, zona zidas importante tebes ba sira ne’ebé mak pozitivu ona, ai-moruk Zona Zidas tenke  fahe ba família sira hotu atu halo prevensaun hosi moras TBC.  (pj6/pj10/pj13/pj16)

No More Posts Available.

No more pages to load.