KHUNTO Prontu ba Remodelasaun

husi -66 views

Timor Post (23/11/2020)—Deputadu Bankada KHUNTO no atuál Vise Prezidente Daruak Parlamentu Nasionál (PN), deputadu Luis Roberto, afirma, membru governu hosi Partidu KHUNTO ne’ebé envolve-an iha oitavu governu konstitusionál prontu simu desizaun hosi Xefe Governu bainhira akontese remodelasaun.

Luis adianta karik KHUNTO nia ema   iha Oitavu Governu Konstitusionál, karik inkapasidade, Xefe Governu iha kompeténsia atu hasai.

“Xefe Governu iha kompeténsia atu hasai sira, nusa mak labele. Kuandu ezekusaun orsamentu mak la iha kapasidade, tenke hasai duni, tau duni rekursu ne’ebé mak di’ak, maibé ne’e kompeténsia Primeiru Ministru nian. Ami ne’ebé hanesan Partidu Polítiku nee, kuandu remodelasaun ba futuru mak akontese duni ba Partidu HKUNTO nia ema, ami tenke simu realidade, tanba ninia kapasidade la to’o,  entaun presiza tau fali rekursu ne’ebé mak di’ak”, Luis informa ba jornalista sira iha PN, segunda (23/11).

Maski nune’e nia defende katak Partidu KHUNTO nia ema sira ne’ebé mak assume pasta hanesan Sekretáriu Estadu, Ministru no Vise Ministru, iha kapasidade natoon para hodi bele halo serbisu, bazeia ba programa no planu ne’ebé Oitavu Governu iha.

Nia hameno ba membru KHUNTO ne’ebé iha governu atu serbisu bazeia ba prosedimentu legal, onestu no responsabilidade.

“Buat ne’ebé ita nian ita han, buat ne’ebé Povu nian, fó fali ba Povu”, Luis fó hanoin

Antes ne’e Xefe Governu Taur Matan Ruak deklara katak remodelasaun bele akontese maibé la ses hosi avaliasaun.

“Ida ne’e opiniaun ne’eb’e akontese maibé atu hakat ba remodelasaun ita tenke halo avaliasaun uluk”, dehan TMR foin lalais.(Jornalista : Julio Salinas Soares)