KHUNTO Aseita Harii Edifísiu foun PN no Rejidensia ba Deputadu Sira

by -211 views
Prezidente Komisaun G ne’ebé trata ba asuntu Edukasaun, Juventude, Kultura no Sidadania iha Parlamentu Nasionál, deputadu Antonio Verdial

Timor Post (21/08/2020)-Deputadu hosi Bankada KHUNTO, Antonio Verdial, hatete, nia aseita vizaun Prezidente Parlamentu nian harii parlamentu foun no uma estadu ba deputadu sira.

“Ha’u hanesan deputadu konkorda tebes ho vizaun ida ne’ebé mai hosi Prezidente Parlamentu Nasionál, tanba hahú hosi primeiru lejizlatura to’o mai lejizlatura dalimak ne’e ita sei uza hela Pallasu governu, ba futuru vizaun ne’ebé PPN iha ne’e di’ak ba uma fukun parlamentu,” informa Verdial ba jornalista sira iha parlamentu nasionál Sesta (21/08).

Eis kandidatu Ministru Interior VIII Governu ne’e reforsa, uma ne’ebé prezidente Aniceto Guterres planea ne’e uma estadu nian, deputadu sira hela ba de’it rotativamente.

“Deputadu ida mai hela ba hodi hala’o serbisu durante tinan 5, remata nia sai entrega fali ba deputadu foun sira hodi hela ba”, esplika deputadu KHUNTO.

Antes ne’e Prezidente Parlamentu Nasionál Aniceto Guterres afirma nia iha devér atu hato’o ninia vizaun hanesan lideransa, maibé iha implementasaun la’o tuir prioridade.

Vizaun ne’ebé Aniceto aprezenta ba Governu liuhosi Ministériu Justisa maka atu buka rai hodi hari kampaun iha laran inklui ona edifísiu Parlamentu, Uma Estadu, klínika, no sentru negósiu iha laran ba deputadu sira.

Entretantu vizaun parlamentu nian refere hetan reasaun maka’as iha públiku tanba povu barak seidauk hetan moris di’ak ukun na’in sira maka aproveita uluk. (Jornalista Julio Salinas Soares)

No More Posts Available.

No more pages to load.