KFP Hato’o Relatoriu Anuál ba Prezidente PN

by -286 views
Prezidente KFP, Faustino Cardoso

(Reportajen Estaziadu Mariano Abi/Asistente editor Hermenegildo da Costa Tilman)

Dili (Timor Post)–Komisaun Funsaun Públika (KFP), hamutuk ho ekipa Téknika Sekretariadu ninian, ohin mai hato’o relatóriu anuál 2021 ba Prezidente Parlamentu Nasionál.

“Ohin KFP mai hato’o relatóriu ba Prezidente PN, simbolikamente atu iha tempu tuir fali mai, KFP bele rona tempu oportunu, bainhira maka KFP mai aprezenta ninia relatóriu iha plenária,” dehan Prezidente KFP, Faustino Cardoso hafoin remata enkontru ho Prezidente PN, iha Uma Fukun PN, Sesta (13/05).

Nia hatete, KFP hanesan Instituisaun Independente ida ne’ebé hari iha ho baze ba lei númeru 7/2009, 15 Jullu, ne’ebé estabelese husi Estadu Timor-Leste, nia hanesan Órgaun responsavel atu regula no asegura Funsaun Públika ida ne’ebé imparsiál, livre husi interese polítiku sira, profisionál, baze ba méritu, presta servisu ho kualidade no proporsionalidade ba povu Timor-Leste.

KFP ninia devér ida mak aprezenta relatóriu atualmente ba PN no Governu iha fulan Marsu nia laran, relasiona ho atividade KFP nian ba tinan anterior nian.

Nune’e, kompeténsia husi PN ninian, liu husi prezidente PN, hamutuk ho distintu deputadu sira, bankada sira, hodi deside no hare tempu oportunu ou tempu biban ne’ebé mak konveniente ba distintu deputadu sira atu konvida KFP mai hato’o ninia relatóriu ba distintu deputadu sira iha nivel plenária.

“Hanesan imi hotu hatene, katak, tinan-tinan sempre tuir Lei KFP ninia devér, hodi hato’o relatóriu anuál ba iha PN liu husi ninia plenária, atu alende relatóriu ba iha xefe Governu, kona-ba implementasaun atividade ba tinan 2021 ninian”.

Iha enkontru ne’e prezidente hato’o de’it katak, tanba PN rasik mós agora okupadu hela ho preparativus sira ba iha eventu investidura pose ba prezidente foun, nune’e mós ba eventu istóriku komemorasaun restaurasaun Independénsia TL nian, no nune’e mós iha hela prosesu prepara ba iha diskusaun balansu ba OJE ninian iha tempu badak.

“Husi enkontru ne’e ami hetan de’it mensajen husi prezidente PN katak, parese iha fin de fulan Juñu, komisaun sei hetan konvite hodi lori mai hato’o relatóriu ba iha nivel Plenária,” nia informa.

Entretantu preparasaun KFP nian ba teste Funsionáriu Kontratadu (FK) ba status permanente ne’ebé mak iha Universidade Nasionál Timor Lorosa’e (UNTL) ne’e, sempre envolve Komisaun Funsaun Públika. rekrutamentu

“To’o ohin loron rekrutamentu ba iha funsionáriu permanente sira, sempre involve Komisaun Funsaun públika, tanba Komisaun Funsaun públika nia hakarak atu fó responsabilidade maxima ba instituisaun ida-idak, inklui instituisaun sira hanesan UNTL ne’ebé sira iha autonomia ba iha administrasaun jestaun, Finanseira, patrimonial,” nia hatete.

Maibé nia dehan, komisaun halo karta husi entidade ida ne’ebé mak assume responsabilidade atu asegura prosesu ne’e la’o tuir Lei, tanba ne’e mak Komisaun Funsaun públika nia prezensa ne’e, liu husi kompozisaun Painél de Juri ne’ebé maioria mai husi instituisaun ne’e rasik inklui husi UNTL ninian ne’e ba iha permanente.

Maski nune’e, jestaun ba kontratu ne’e, fila ba iha instituisaun ida-idak, depende nia iha orsamentu ka lae, depende vaga iha ka lae no orsamentu iha, ba vaga sira bele hala’o ka lae, depois see rekrutamentu ne’ebé mak hala’o ne’e, atu hetan ema nu’udar ajente administrasaun públika, signifika depois de prosesu rekrutamentu, komisaun tenke hetan lista ema sira ne’e hodi hetan ajusta iha komisaun públika ninia sistema baze de dadus.

“Maibé, see rekrutamentu ba iha kontratu ne’ebé selu husi Bens servisu ne’e, ate Komisaun Funsaun Públika rasik mós la iha baze de dadus kona-ba sira ne’ebé mak tama kategoria kazuista, ne’e fila hikas ba instituisaun,” hakotu. (Lee Notísia Seluk Iha Jornál Timor Post/ Asesu You Tube Timor Post)

No More Posts Available.

No more pages to load.