Kazu Rai Kotu, Tenke Investiga Mos Suspeitu nia Feen Nu’udar Membru PNTL

by -120 views
Deputada Maria Gorumali Barreto

Timor Post (05/11/2020)— Membru Komisaun F iha Parlamentu Nasionál ne’ebé trata ba assuntu Saúde, Seguransa Sosiál no Igualdade Jéneru, Deputada Maria Gorumali Barreto husu atu autoridade kompetente halo mós investigasaun ba suspeitu kazu Rai Kotu nia feen nu’udar mós membru Polísia Nasionál Timor Leste (PNTL).

“Husu ba PNTL atu servisu ho imparsial no halo prosesu  investigasaun ba mos suspeitu nia feen kaben nu’udar membru PNTL ne’ebé servisu hela iha Diresaun Rekursu Humanu – Kuartel Jerál PNTL,” reprejentante povu subliña kestaun ne’e ba Timor Post relasiona ho kazu mane ho inisiál LH iha loron 30 Outubru 2020 oho inan feton ho naran Domingas Soates no hakanek matebian nia oan feto Lindy Moy.

Nia afirma, Ministériu Públiku tenke rekolla evidénsia hotu tuir prosesu akontesementu ne’ebé iha no análiza kazu ne’e ho klean tanba natureja kazu ne’e omisídiu, tentativu halo violasaun sexual, krime planeadu tanba suspeito ba lori ho tudik, uza maskara metan.

“Ami lakohi iha tan vítima Mingas (Matebian Domingas Soares) seluk atu akontese iha futuru. Tanba ne’e husu ba Tribunal fó pena prizaun todan igual ho nia aktus ne’ebé nia rasik komete,” Deputada Gorumali hatete.

Nia hatutan, kazu sériu ho nia natureza krime omisídiu ne’ebé grave hasoru feto faluk ida ho nia oan feto.

Nune’e, nia hatutan tan, Polísia Investigasaun Kriminal no Polisia Vulneravel Unit ka VPU halo esforsu hodi relata relatóriu investigasaun ho klaru no detallu bazeia ba prosesu akontensementu.

“Preokupasaun ne’ebé sai perguntas boot mak tanba-sá polísia hamoos tiha ran ne’ebé fakar iha uma laran? Tanba-sá mak fatin akontesementu la marka Polis Line? Ida ne’e mak preokupasaun objetivu saida mak ne’e?,” Deputada Gorumali kestiona.

Nia dehan, ran ne’ebé fakar iha uma no sasan ne’ebé hetan estragu ne’e sai evidénsia, maibe realidade hamos hotu.

“Ita espera katak la fó impaktu ba iha hahalok krimi ne’ebé akontese hodi la hamenus nia pena prizaun ba aktus ne’ebé sujeitu komete. Ita persiza kontinua observa ba kazu ida ne’e husi servisu polísia nian, Ministériu Publiku no Tribunál,” Gorumali dehan.

Entretantu relasiona ho krítika sira hasoru organizasaun feto iha rai laran liga ho kazu Rai Kotu, reprejentante povu ne’e subliña, ne’e normal.

“Se bainhira ema kecewa ho organizasaun ne’ebé fo asisténsia no advokasia ba feto no labarik feto, klaru ema tenki hatoo nia krítika hanesan ema umanu,” Deputada Gorumali salienta.

Nia hatete, organizasaun feto sira hetan apoiu fundus husi governu, husi Ajénsia UNU no NGO’s International ne’ebé apoiu direta ba Servisu Asisténsia Vítima, apoiu ba Uma Mahon i apoiu ba Advokasia ba Direito feto no labarik feto hodi asesu ba Justisa.

“Tanba ne’e, razaun ema krítika. Se ita servisu iha area asisténsia vítima, situassun ne’ebé akontese iha Rai Kotu ne’e persiza tebes asisténsia vítima hodi hamaluk vítima no nia família,” Deputada subliña.

Nia dehan, apoiu oioin halo ligasaun ho parseru sira ne’ebé hamahan a’an iha Rede Referal ba Kazu Violénsia Bazeia ba Jéneru no Rede Advokasia ba Kazu Violénsia Bazeia ba Jéneru.  Realidade asisténsia ba familia vítima ne’e la hetan iha dia 30 de Outobru.

Tuir nia, família mak halo kontaktu ba mai ezije ba autópsi pesoal, la-iha transporte i família mak ba tula no difikuldade seluk tan.

“Ha’u rasik n’ebé iha esperiénsia ba asisténsia vítima mosu perguntas Rede referal no rede advokasia sei eziste ka la’e? Ha’u sujere ba ita hotu, simu krítika ho hanoin ne’ebé dook hodi análiza no halo reflesaun ba ita nia servisu. La persiza fila kontra malu fali i haluha vítima atu asesu ba justisa i suspeitu nia hahalok krime sira ne’ebé akontese iha pasadu hodi junta ho aktus krime ne’ebé akontese,” Deputada Gorumali subliña.

Nu’udar membru Komisaun F, Deputada Gorumali hatete, sei halo diskusaun  iha komisaun no monitoriza lalaok kazu Iha Tribunal. No tanba komisaun iha kompeténsia sei konvida organizasaun servisu ba Direitu Feto no Instituisaun Governu hodi halo audénsia ho Rede Referal no Rede Advokasia.

Nune’e mós iha audénsia no debate Orsamentu Jerál Estadu 2021 sei fó atensaun máximu ba Instituisaun Governu ne’ebé relevante ba alokasaun orsamentu espesífiku ba implementassun Planu Asaun Nasional Violénsia Bazeia Ba Jéneru no Planu Asaun Nasional 1325, PAN ba Labarik iha Programa Governu nian.

Entretatu suspeitu ba kazu ne’e, hafoin polísia servisu hamutuk ho komunidade halo kedas kapturasaun hafoin akontesimentu, lori ba sela no iha primeiru interogatóriu, Tribunál Distrital Dili foti ona desizaun aplika prizaun preventiva ba suspeitu LH hodi hein investigasaun no julgamentu tuir mai. (cao)

No More Posts Available.

No more pages to load.