Kazu Na’ok Riku Soin Matebian Eis Membru Governu, Polísia Deteta Tan Evidénsia iha Lautem

by -1.288 views

Jornalista Jaime Pires / Editór Noémio Falcão

Dili (Timor Post)—Polísia Nasionál Servisu Investigasaun Kriminál (PNSIK) hafoin detein suspeitu na’in-8 ne’ebé deskonfia na’ok riku soin matebian eis membru governu ho inisiál CC, deside aranka ba Munisípiu Lautem hodi rekolla tan sasan evidénsia sira inklui karreta ho marka Triton.

Liutiha loron tolu, to’o Kinta (10/12/2021), PNSIK deteta no prende tan evidénsia sira inklui motorizada rua ho karreta ho marka Triton ne’ebé sei iha hela Lospalos.

Fonte Timor Post ne’ebé akompaña mos prosesu ne’e haktuir, motorizada tolu (3) ho karreta Triton ne’e suspeitu sira hola husi Inglaterra. Tanba deskonfia uza riku soin matebian nian maka polísia hahú prende tiha ona motorizada ida, rejista de’it motorizada ida seluk ne’ebé dehan faan fali ona no sei aranka ba investiga no foti motorizada ida ho karreta Triton iha Munisípiu Lautem.

Antes ne’e, polísia ba lori suspeitu iha sira nia uma iha fatin lima mak hanesan, Bekora, Mandarin, Delta-2, Surikmas no Tasi-Tolu.

Iha Tasi-Tolu, polísia prende karreta-rua no motorizada-ida, no dada kedas fita polísia ba uma.

Iha Bekora, polísia prende karreta ho marka Ranger-ida no motorizada-ida ho konta bankaria lima (5).

Kazu ne’e, PNSIK toma medida tanba ezukuta mandadu husi Tribunal Munisipál Dili ho númeru Nuc 22/21. PGGCC ba krime Furto Agravado.

Suspeitu na’in-8 ne’e komete hotu iha kazu hanesan, na’in -neen feen-la’en, inkuantu na’in-tolu sei klosan.

Suspeitu na’in-8 hafoin kaptura lori kedas ba iha edifísiu PNSIK Kaikoli, Tersa (07/12/2021) hodi kontinua halo prosesu identifikasaun no investigasaun, hotu ida ne’e tama kedas ba sela detensaun durante oras-72 no kontinua submete ba Ministériu Públiku.

Suspeitu na’in-8 ne’e ho naran inisial mak hanesan, GADS, AVR, RJC, OVR, TSX, MDFA, OCX no DAJL.

No More Posts Available.

No more pages to load.