Kazu Envolve Lideransa Tenke Hasai Imunidade

by -171 views
Sergio Quintas

DILI (Timor Post) —Jurista Timoroan, Sergio Quintas hatete, tuir lei kazu sira envolve lideransa ne’ebé assume hela kargu hanesan Ministru, Sekretáriu Estadu no Deputadu tenke hasai tiha sira nia imunidade hodi bele partisipa julgamentu iha Tribunál.

“Tuir ha’u nia hanoin deputadu ou membru governu ida maka bainhira komete krime ida tenke hasai nia imunidade ne’ebé nia goza hela durante nia mandatu,” dehan Sergio ba Timor Post, Segunda (02/08).

Nia esplika katak lei ka norma fó dalan liu hosi artigu 94 no artigu 114 Konstituisaun RDTL, ne’ebé hatete se membru governu ida maka deskonfia komete krime ruma lá presiza suspende nia husi nia servisu maibé hasai de’it nia imunidade hodi labele impede nia husi aktu prosesual.

Hosi sira ne’e mai ho razaun katak, ba hotu tenke respeitu nafatin prinsípiu de prezunsaun de inosénsia iha artigu 34 númeru 1 Konstituisaun RDTL.

“Maibé tuir hau nia hanoin norma konstitusionál ne’ebé iha artigu 94 no 114 née iha tendênsia diskriminativa tanba kontra prinsípiu jerál direitu penal kona-ba equality before the law,” esplika tan nia.

Enkuantu, liga ba prosesu kazu envolve sekretáriu Estadu Arte no Kultura, ba kazu fen tara an, Governu lá presiza atu suspende nia atividade servisu, tanba tenke respeita ema nia prejunsaun inosénsia.

Maibé nia husu parte ne’e tenke kumpre iha investigasaun Ministériu Públiku, nune’e parte sira bele aselera lalais investigasaun ba prosesu kazu refere.

“La presiza suspende nia servisu, maibé husu ba Sekretáriu estadu Arte no Kultura atu kolabora no submete iha investigasaun, karik la kolabora MP bele halo levantamentu hodi hasai nia imunidade hanesan membru governu,” dehan nia.

Enkuantu, Liga ho Investigasaun inkéritu kazu espoza hosi Sekretáriu Estadu Arte Kultura (SEAK) Teófilo Caldas, vítima Levinita Madeira mate tanba Taraan, Ministériu Públiku Liu hosi Ofisial Prokuradór halo ona investigasaun hodi rekolla prova balu.

Tuir ofisial nee dehan, Ministériu Públiku bolu ona Matebian nia laen, atuál Sekretáriu Estadu Arte Kultura (SEAK) Teófilo Caldas, hodi fo deklarasaun kona bá kazu ne’e akontese.

Nia dehan, kuandu iha notifikasaun dala rua tolu, mak parte sira la marka prezensa, mak Ministériu Públiku sei prosesa tuir dala legal.

“Se ita notifika la mai, Ministériu Públiku bula dalan alternative seluk, katak tenke liu hosi dalan legal, ho objetivu prosesu investigasaun bele hotu ho lalais,” dehan tan.

Enkuantu, la iha ho informasaun hanesan, antes nee ofisial prokuradór nee informa ona katak, kona ba prosesu nee rasik Ministériu Públiku sei la delega kompeténsia ba Polisia hodi halo investigasaun, tanba Ministériu Públiku mak sei rekolla rasik prova.

“Ita mós sei rekolla hela prova sira, hanesan deklarasaun Sasin, no prova seluk, ita espera lato’o fulan 3 hodi ita submete mai tribunál halo julgamentu normál,” nia hatete.

Ikus kazu ne’e akontese iha loron Domingo, (16 fulan Maiu) iha suku Bebonuk, postu administrativu Don Aleixo Komoro.(jxy)

 

No More Posts Available.

No more pages to load.