Kazu COVID-19 Kontinua Aumenta, Ema Na’in-65 Agora iha Izolamentu

by -19 views

Timor Post (11/03/2021)—Sala Situasaun Sentru Integradu Jestaun Krize (SIJK) anunsia ema hamutuk na’in 65 husi Munisípiu Dili no Postu Administrativu Fatumea, Munisípiu Kovalima maka agora sulan hela iha sala izolamentu.

Númeru ne’e aumenta tanba ohin, rejista tan kazu foun 14 inklui na’in-12 husi Dili no na’in-2 husi Fatumea.

Liuhusi konferensia ba imprensa, Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araújo haktuir, husi Dili, husi amostra ne’ebé rekolla iha atividade buka-tuir kontaktu besik ho kazu pozitivu;

a) Pozitivu 1 kontaktu-besik husi kazu Bebonuk;

b) Pozitivu 8 kontaktu-besik husi kazu sira SEFOPE;

c) Pozitivu 2 kontaktu-besik  ho  kazu  Ministériu Ffnansas no Ministériu  Transporte i Komunikasaun;

d) Pozitivu 1 iha aldeia 4 de Setembru, Tasi Tolu,

Ho  nune’e,  kazu detetadu  ka  pozitivu  iha  Dili, hamutuk  hotu  36, fahe  ba foku/agrupamentu/cluster hanesan tuir mai:

a) BTN II-Terra Santa, Suku Madohi: kazu 6.

b) Aldeia Gólgota, Madohi: kazu 3.

c) Aldeia Lurumata, Suco Madohi: kazu 2.

d) Aldeia 4 Setembru, Comoro: kazu 1.

e) Aldeia Fomento I, Suku Comoro: kazu 3.

f) Aldeia 05, Suku Fatuhada: kazu 3.

g) Bebonuk: kazu 2.

h) Delta: kazu 1.

i) Ministériu Finansas: kazu 3.

j) SEFOPE: kazu 9.

k) Ministériu Transportes e Comunicação: kazu 2.

l) Hospital Nacional Guido Valadares: kazu 1.

36 kazus iha cluster 12: instituisaun 4, Suku 4. iha Postu Administrativu D. Aleixo

PROGRESU HUSI ATIVIDADE  PREVENSAUN  &  MITIGASAUN  SURTU COVID-19  IHA MUNISIPIU  COVALIMA.

  1. Serka sanitaria iha  Munisipiu  Covalima  hapara  ona,  atividade  iha  Suai  vila,  no  postu administrativu sira, eseptu Fatumea hahú la’o normal, maibé eskola ho administrasaun públika foin maka bele hahú funsiona hirak iha segunda-feira oin mai.
  2. Ohin iha Postu Administrativu Fatumea, deteta hikas pozitivu nain rua, ho CT entre 39 ho  42 –signifika iha  ona  faze  rekuperasaun- husi kontaktu- besik  nain  rua  ne’ebé  halo sira nia segundu teste. Ho nune’e, kazu iha Fatumea sae ba 15.
  3. Ekipa konjunta saúde  sei  nafatin  buka-tuir  kontaktu-besik  husi  kazu  pozitivu  sira  iha Fatumea.

 

DADUS JERAL:

1) Kazu foun: 14.

2) Kazu rekuperadu: 0.

3) Kazu ativu: 65.

 

ESPLIKASAUN ADISIONÁL

Aproveita oportunidade atu esplika ba públiku  tomak konseitu KONTAKTU-BESIK. Wainhira deteta  kazu  konfirmadu  ida,  presiza  buka-tuir  ema  hotu  ne’ebé  hala’o  kontaktu-besik  ho kazu ne’e.

Tama  iha kritériu  kontaktu-besik ema hotu ne’ebé:

  1. Iha kontaktu, ka hasoru malu ho ema ruma ne’ebé rezultadu teste pozitivu, durante ka liu  15 minutus, iha distánsia menus husi metru 1, bele iha uma-laran, ka bele mós iha liur;
  2. Moris hamutuk iha uma ida ho ema ruma ne’ebé rezultadu teste pozitivu;
  3. Tu’ur iha distánsia kadeira  rua  ho ema  ruma  ne’ebé  teste  pozitivu, iha  transporte públiku terrestre, iha ro-ahi ka iha aviaun;
  4. Hamutuk iha fatin sira  hanesan : uma-laran,  ka fatin sorumutuk, ho ema  ne’ebé  iha rezultadu teste pozitivu durante liu oras rua nia laran;
  5. Halo kontaktu fiziku ho ema  ne’ebé  rezultadu  teste  pozitivu, sein uza  ekipamentu protesaun individual halo loloos;
  6. Halo atendimentu ba pasiente  pozitivu  sein  uza ekipamentu  protesaun individual  halo loloos;

Ekipa konjunta saúde nia iha terrenu agora fokus liu iha rekolla amostra husi kontaktu-besik, tuir  kriteriu  ne’ebé  defini  iha  leten,  hodi  nune’e  bele  hakotu  korrente  transmisaun  iha foku/agrupamentu/cluster  hirak  ne’ebé  temi ona iha  leten. Ita  sei  iha  amostra  atus-ualu. (*/cao)