Kandidatu PR Na’in Haat La Partisipa, Jose Belo : Ne’e Laiha Problema

by -362 views
Serimonia Ritual no Asinatura "Paktu Eleisaun Pasífiku" hosi Kandidatu Prezidente Periodu 2022-2027, iha Salaun Laline-Lariguto CNE, Segunda (28/02). Foto TP/Maria Lizia

(Reportajen Jaime Pires/ Edito Mateus da Cruz)

Dili (Timor Post)- Serimónia ritual asina paktu unidade nasional ne’ebé hala’o Segunda ne’e, la partisipa hosi kandidatu na’in haat, maka hanesan kandidatu prezidente repúblika Izabel da Costa Ferreira, Armanda Berta, Mariano Assanami Sabino no Antero Bendito.

Prezidente Komisaun Nasionál Eleisaun (CNE), José Belo, hatete, kandidatu Prezidente Repúblika sira la partisipa iha serimónia assina paktu unidade nasionál ne’e laiha problema.

“Sim Kandidatu sira la mai partisipa ne’e laiha problema tanba sira delega hela sira nia reprezentante sira mai partisipa no asina akordu paktu unidade paz iha eleisaun prezidensiál 2022 ne’e,” dehan Nia bá jornalista sira iha nia servisu fatin CNE, segunda (22/02) ne’e.

Nia subliña, maski serimonia ne’e importante maibe kandidatu balun la partisipa tanba ho difikuldade seluk ka servisu seluk ne’ebé mak sira tenke halo.

“Ita nia konvite ba sira antes no konvite ne’e ba sira kandidatu sira hotu-hotu, maibé ohin sira balun la partisipa tanba iha kestaun balun sira tenke halo, maibé sira nia reprezentante mai.

Nia esplika, serimonia ne’e importante ba kandidatu sira atu nune’e sira halo kompromisiu ba malu hodi labele insulta malu ka trata malu iha kampaña, maibé promove unida no paz.

“Serimonia ohin ne’e ita halo kompromisiu no hamulak ho parte kultura nia, karik se mak viola buat sira ne’ebé mak halo ne’e sei simu nia sansaun, sansaun tuir kultura nia tanba kultura ohin halo sala simu kedas nia sansaun la’e maibé sei kona iha tempu seluk,” dehan Nia.

Enkuantu serimónia ho nia tema Paktu eleisaun Pasífiku ho kultura ita promove paz no unidade iha eleisaun Prezidente 2022, ne’e realiza iha Salaun Komisaun Nasionál Eleisaun (CNE), Lalini-Larigutu, segunda (28/02) no partisipa másimu husi kandidatura sira. (Lee notisia seluk iha jornal Timor Post/asesu youtube Timor Post)

No More Posts Available.

No more pages to load.