Kampaña Kandidatu Horta iha Tasitolu, Poltranz Prende Motorizada 108

by -1.458 views
Polisia halo apreensaun ba motorizadas 108 iha kampana kandidatu PR Jose Ramos Horta iha Tasitolu, Imajen Esp

(Reportajen Jaime Pires/Editor Mateus da Cruz)

Dili (Timor Post)- Kampaña Kandidatu Prezidente Repúblika, José Ramos Horta iha Tasi-Tolu, Polísia Nasionál Timor-Leste (PNTL), halo apreensaun ba motorizada 108 tanba viola kódigu estrada.

Motorizada sira ne’ebé mak PNTL prende ne’e, tanba militante no simpatizante sira husi partidu CNRT, ne’ebé ba partisipa kampaña hodi fó apoiu ba kandidatu Horta, maioria la uza kapasete no balun uza motor kanu resin.

Motorizada sira ne’ebé mak PNTL prende, lori kedas ba tau iha Komandu PNTL Munisípiu Dili, hodi fó Billete ba na’in sira hodi ba selu multa iha banku hafoin bele entrega fali ba motor na’in..

Antes ne’e Komandante Polísia Nasionál Timor-Leste, Unidade Tránzitu Nasionál,  Superintendente Polísia, João Belo, alerta ona ba militante sira atu labele kontra kódigu estrada bainhira tuir kampaña, tanba polisia tránzitu sei atua ho rigorozu tui lei tránzitu nian.

“PNTL mobiliza nia forsa hotu-hotu atu apoiu seguransa ba kampaña nia relasiona ho estrada, tránzitu sei atua ho rigorozu ba maluk sira ne’ebé tuir kampaña maibé halo violasaun ba regra tránzitu liuliu ita ko’alia kona-ba kódigu estrada nian,” dehan João Belo, iha postu tránzitu Tasitolu.

Nia dehan simpatizante kandidatu sira halo bele ba tuir kampaña maibé nafatin kumpri lei kodigu estrada nia, liuliu tenke uza kapasete, labele uza motor kanu resin no regra sira seluk ne’ebé regula movimentu estrada nia. (Lee notisia seluk iha Timor Post/Asesu You Tube Timor post)

No More Posts Available.

No more pages to load.