Kada Tinan Presiza Tonelada 137.800 Produsaun Rai Laran

by -162 views
Foto Espesial

DILI (Timor Post)—Atu responde ba nesesidade povu nian atu labele hasoru hamlaha, kada tinan presiza tonelada 137.800 ba produsaun rai laran, enkuantu ba tinan ida ne’e produsaun rai laran atinji tonelada 72.

“Ita nia populasaun millaun 1.3, iha tinan ida ita presiza 137.800 tonelada, daudaun ne’e ita produs mak 72 mill tonelada, kerdizér kee ita presiza nafatin 60 mill tonelada,” Diretór Jerál Ministériu Agrikultura no Peska (MAP), Odete Maria do Céu ba Timor Post, iha knar fatin Komoro, Tersa (05/10).

Nia dehan, nasaun barak iha mundu ne’ebé produsaun rai laran sa’e maka’as maibé nafatin importa foos husi nasaun seluk, nune’e mos Timor-Leste.

Aleinde ne’e, nia informa, produsaun batar tinan ne’e kolleita hamutuk 85 mill tonelada, inklui produtu agríkola seluk, hanesan fore mungu no fore-keli, bele atinji too 500 tonelada.

Tanba ne’e, nia hatete, kada tinan MAP lakoka orsamentu ba folin fini hamutuk 130 tonelada no ida ne’e bele responde ba iha 5.250 ektare.

No governu mós, nia dehan, iha prioridade barak liuliu iha agrikultura nian, hanesan irrigasaun, fini, adubu no seluk tan. Nune’e mós iha ajénsia internasionál hanesan JICA, TOMAK, WIO no sira mós konsentra hotu ba agrikultura nian.

Portantu, polítika ministériu nian atu hasae produtividade, nia dehan, liuhusi kualidade fini no adubu. Tanba ne’e MAP kontinua aplika adubu Popnasa no ministériu mós fiar katak sei iha emprezáriu lokál balun ne’ebé iha interese atu investe iha setór agrikultura.

Entretantu, governu mós aprova ona dekretu lei hodi apoiu subsídiu ba funsionáriu públiku sira liu husi produtu lokál, maibé produsaun rai laran seidauk bele responde ba nesesidade povu nian kada tinan.

Iha sorin seluk, Reitór Universidade da Paz (UNPAZ), Adolmando Soares Amaral, hateten Timor-Leste nasaun agrikultura no populasaun moris nu’udar agrikultura.

Tanba tuir nia, Timor-Leste rai ki’ik no rai produtivu uitoan, nune’e populasaun sira hala’o vida agrikultura ne’e hodi hatán ba nesesidade loron-loron nian.

“Governu halo polítika sein bazeia ba peskiza ruma. Maibé governu halo polítika ida ne’e sai problema inklui problema mós ba governu,” Adolmando dehan.

Ne’ebé, kona ba governu atu fó subsídiu ba funsionáriu públiku kada fulan, nia sujere diak liu halo uluk peskiza, katak produsaun rai laran ne’e sufisiente hodi responde ba subsídiu ne’e ga la’e?.

Tanba ne’e, atu responde ba produsaun rai laran iha futuru mak, presiza dezenvolve uluk infraestrutura bázika sira hanesan estrada, irrigasaun, produsaun fini ho kualidade no adubu. (jho)

No More Posts Available.

No more pages to load.