K12N Ezije Governu Rezolve Polémika ‘Armindo Borges’

by -967 views
Prezidente komité 12 Novembru ,Gregorio Saldanha, halo konferénsia imprensa, Kuarta (14/04), iha Balide Foto TP/Isaura Lemos

(Reportajen Jose Caet/Editor Rosa Garcia)

DILI—Komité 12 Novembru ezije governu ne’ebé lideradu hosi Primeiru Ministru Tuar Matan Ruak, atu rezolve polémika matebian Armindo Borges, ne’ebé deskonfia mate tanba Covid-19.

Prezidente komité 12 Novembru Gregorio Saldanha, deklara hanesan timoroan ne’ebé hamahon-an iha komité iha obrigasaun atu hato’o preokupasaun kona-ba konsekuénsia hosi impase polítika, pandemia Covid-19 no dezastre natural akontese iha Timor-Leste.

“Ami husu governu lideradu hosi Primeiru Ministru, Taur Matan Ruak, atu foti desizaun lalais hodi rezolve polémika kona-ba ita nia maluk ida mate ne’ebé oras ne’e sei tau hela iha sentru izolamentu vera krús ho atensaun makaas hosi maun boot Xanana Gusmão,” deklara Gregorio hafoin halo pres konferénsia iha sede komité 12 Novembru Vilaverdi, kuarta (14/04).

Mate restu ne’e sente preokupa tanba dezentendimentu ne’e dada naruk ba beibeik hodi hamosu ema barak maka atu konsentra iha sentru izolamentu Vera Krús. Tan ne’e sira preokupa liu kona-ba lider nasionál Kay Rala Xanana Gusmão.

Tanba durante loron tolu tiha ona, nia kontinua hein mate isin Armindo Boges nune’e mós lider nasionál ne’e toba de’it iha estrada laran kalan rua tiha ona.

Nune’e mós preokupa kona-ba situasaun seguransa iha sentru izolamentu vera krús halibur ema barak ho temperatura makaas no bele mosu deskontrolu ne’ebé la presiza.

“Ami mós husu dirijente polítika atu labele hasai deklarasaun violénsia sira hanesan atu ‘tiru populasaun’ tanba ita nia povu sira presiza autoridade seguransa sira nia protesaun”, nia lamenta

Tanba ne’e komité 12 Novembru husu autoridade Polisia Nasionál Timor-Leste (PNTL) atu hatudu sira nia servisu profisionál ne’ebé hatudu loron hirak iha vera krús.

Nia dehan, ulun boot povu Timor-Leste presiza halo konxiénsia atu hatuur povu ninia interese aas liu ida-idak nia interese hanesan saudozu matebian La Sama nia liafuan katak ‘ha’u nia dignidade la aas liu estadu nia dignidade’.

Gregorio Saldanha rekomenda ba ulun boot sira atu kontinua buka malu nafatin, hodi rezolve dezentendimentu sira ne’ebé dala-ruma bele mosu, tanba demokrasia ne’e hili ona atu lori povu ba moris di’ak.(Lee Nutisia Kompletu iha Diariu Timor Post, Edisaun Kinta, 15/4/2021)

 

 

No More Posts Available.

No more pages to load.