JUVENTUDE SAI PONTE SENTRAL BA LIÑA VERDADE, UNIDADE, PAZ I ESTABILIDADE

by -647 views
Adelino Do Santos Elo

Hakerek nain: Adelino Do Santos Elo (+6282145973910) Maumere Of Flores (Mof)

Juventude ne’ebe mak fo sira nia an tomak ba rai ida ne’e durante prosesu ba timor-leste nia luta to’o ba ukun rasik an ne’e bo’ot tebes no labele atu kompara (é incomparável), sira sakrifika sira nia an tomak ho espíritu nasionalismo no patriotismo ne’ebé radical no forte tebes hanesan ita bele hare’e liuliu iha loron 12 de Novembro de 1991 ne’ebe mosu tragédiabo’ot ida iha Timor ho naran coñesido “masacre de santa cruz”.

Iha momentu ne’eba juventude sira husik hela sira nia família, husik hela sira nia interese privado no mai husi organizasaun oi-oin no fatin la hanesan maibe ho hanoin ida deit katak mate ka moris Timor-Leste ukun rasik-an, ho juventude sira nia dedikasaun tomak ne’e mak ohin loron ita bele goza ita nia liberdade. wainhira juventude sira iha momentu ne’eba mak la brani fo sira nia an ba mate karik ha’u hanoin ohin loron ita mós sei la goza ida tamba ne’e ita tenke hatene katak husi sira mak ita hetan liberdade no sira mak ita nia asuwain loloos. Juventude iha momentu ne’eba brani tebes no kontribui ba rai ida ne’e sem rezerva maibé depois de independência, ikus-ikus ne’e ema konsidera juventude la’os fali agente transformador ba dezenvolvimentu maibé juventude mak autor ba konflitu fali no dalabarak mosu termu foun ida la’os ona naran juventude maibé naran fali “juventuda” katak juventude mak autor ba tuda malu.

Iha kontekstu atual iha Timor-Leste ita hare’e katak juventude ida ba uluk unidade metin loos, maibé tempu atual ita la hare’e ona tan de’it organizasaun arte-marsiais e ao mezmo tempo juventude ida ba uluk tau interese nasional boot liu hotu, se wainhira hare’e ba tempu atual , claramente ita la hare’e ona tan de’it interese privadu ka interese organizasaun nian mak boot liu. Juventude ida uluk kria unidade nasional hamutuk hodi kontra inimigu, maibé juventude ida agora ne’e barak mak hamrik hodi kontra malu no sai inimigu ba malu fali no komesa lakon ona sentimentu patriotismo no nasionalismo. Entaun hanesan juventude pergunta ida mai ita mak ne’e será que ita nia maluk juventude sira uluk fo sira nia isin tomak ba mate ne’e para ohin loron ita uza ita nia liberdade hodi estraga malu fali no esraga ita nia maluk sira? ka ida ne’e mak juventude barak mate ne’e nia hakarak? Com certeza katak ida ne’e la’os sira nia hakarak, sira nia hakarak ne’e mak povu ida ne’e moris hakmatek, iha estabilidade, segurança no dezenvolvimentu hodi ba atinji moris diak, entaun mai ita nudar juventude atu iha dezenvolvimentu tenke iha estabilidade no ita iha responsabilidade boot hodi kria estabilidade iha rai ida ne’e, ho ida ne’e de’it mak bele hatudu ita nia valorizasaun ba ita nia maluk juventude sira be mate ona ba rai ida ne’e.

Istória Mak Sai Sasin Ba Futuru
Istória pasadu husi relatória chegal- iha loron 12 de Novembru 1991, Tropas seguransa Indonézia tiru manifestante rihun-resin ne’ebé halibur malu iha Semitériu Santa Cruz-Dili. Manifestasaun kontra okupasaun Indonézia nee organizado husi grupu klandestina iha Dili, no konsidera nu’udar manifestasaun boot liu husi tinan 1975. Tensaun iha Dili aumenta, relasiona ho anúnsiu iha fulan Agustu kona ba vizitasaun delegasaun parlamento portuguesa. Rezisténsia sira prepara manifestasaun boot ida relasiona ho vizitasaun neebe planeia ba loron 4 de Novembru nee. Maibe iha loron 25 Outubru Parlamentu Portuges, kansella vizitasaun nee nu’udar protestu ba pedidu indonézia atu nune’e jornalista Jill Jolliffe no Rui Araujo la permite akompaña iha delegasaun ne’e. Kansekuensiamente halo parte rezisténsia sira frustradu, liliu tanba preparasaun sira neebe halo husi movimentu klandestina iha teritório tomak hodi foti risku hato’o sira nia rede ba servisu informasaun Indonézia.

Fulan Outubro remata, aumenta tan presaun militar Indonésia hasoru ativista sira iha Dili, ho nia akontesimentu prinsipal mak atake ba Igreija Mota’el, iha loron 28 Outubru. Iha atakesaun nee akausa joven nain ida mate fatin (Sebastião Gomes), no ativista klandestiana. Hafoin kazu homesidus ne’e, parte rezisténsia deside atu serimónia kari ai-funan ba Sebastião Gomes iha loron 12 de Novembru, no altura ne’eba Relator Espesial Nasõens Unidas ba Turutura, Prof. Peter Kooijmans iha hela Dili-atua hela manifestasaun hodi ezije independénzia. Iha loron 12 de Novembru 1991, kuaze ema 3.500 mak partisipa misa iha igreja Mota’el no misa remata maizumenus tuku 07.00 dader. Hafoin tuir kedas ho prosesaun husi igreja ba Semiteriu Santa Cruz. Prosesaun ne’e nakfila ba manifestasaun ida. Loron 12 de Novembru ninia inísiu mai husi saudozu Sebastião Gomes nia mate iha Mota’el. Husi ne’e maka juventude loriku as’wain sira halibur hamutuk halo asaun solidaridade hodi kontra militar Indonézia, liu-liu defende justisa no direitus humanus. Hakesi’an ho Espirito nasionalizmu no patrriotizmu. Loriku as`wain sira ho lia ida de`it (lia neebe komandante FALINTIL saudozu Nikolau Lobatu deklara “Pátria ou morte, vencerá”) liafuan nee motiva juventude loriku as’wain sira no sai hanesan “forsa” hodi luta hasoru militar Indonézia.

Juventude mak Futuru, Autor ba Unidade Paz no Estabilidade
Uluk ita nia joven sira ne’ebe oferese sira nia a’an ba nasaun ukun a’an ne’e, sira laos ema violentu, sira hadomi paz, sira hakribi violentu, tamba sira la lori kilat hodi hasoru inimigo maibe sira lori sira nia lian, hakilar deit lian, hakilar direitu lian nian, maibe ema hatan ho violentu katak konsikuensia mak mate, entaun ida ne’e fo atensaun mai ita katak ita atu hakribi violentu iha momentu ne’eba ne’e no tamba sa mak momentu ida agora ne’e ita hakarak halo violentu, tamba ne’e ba joven sira hotu-hotu katak hakarak uza oportunidade ida ne’e no hateten katak fo oportunidades ba tempu ita boot sira nian ne’e ba buat ne’ebe diak, no kondição ne’ebe estadu ne’e kria, buka aprende nafatin, se tempu eskola karik eskola nafatin no buka atu aprende, hakiak nafatin, dame iha ita nia bairo no ita nia kolega sira no grupo sira atu fo oportunidades diak ba ita nia jerasaun sira no lider sira ne’ebe oras ne’e dadaun hodi hatan ita nia preokusaun ne’ebe ita iha liu-liu ba dezemprego nian no kona-ba edukasaun.

Nelyo Isaac(SEJD) dehan Juventude loriku as’wain oferese sira nia a’an hodi doko mundu atu fo atensaun ba ita nia prosesu ukun a’an ida ne’e, wainhira sira mobiliza malu ho voluntariu no lahatene katak sira nia vida ne’e ohin hotu mak ne’e, maibe sira lori ba no ikus mai sira hetan konsikuensia sofre no balun mate no balun ita lahetan to’o agora . Atu fo hanoin ba ita nia jerasaun sira ne’ebe tuir mai ne’e no kona-ba kontribuisaun ema hotu-hotu nian liu-liu ba joven sira no ita bele dehan katak jerasaun kontinuador sira ne’e maka ita foti loron ne’e hanesan loron nasional juventude, atu fo hanoin ba juventude hotu-hotu katak ita labele loko a’an demais, ita labele hateten katak hau mak matenek liu fali ema sira ne’ebe fo a’an ba rai ida ne’e, maibe ita so iha hanoin ba ita nia laran katak “ba o nasaun hau pronto atu servi, iha kualker setor ne’ebe bolu hau atu kontribui”, ezemplu balun iha desportu karik, balun agricultura karik , balun kondutor karik, maibe ita tenke hamutuk nafatin no unido nafatin atu resolve ita nia kestaun ne’e mai ita resolve laos bolu fali ema seluk atu resolve.

Atan ha’u hanesan hakerek na’in sei hanoin intervensaun Dr.José Ramos Horta nian ho topiku “Papel juventude iha luta libertasaun patria no dezemvolvimento” hateten problema povu Timor-leste no mundu infrenta ohin loron maka be’e mos, edukasaun, no saude. Iha nia intervensaun hanesan orador ba komemorasaun masacre santa kruz ba dala 28 no selebrasaun loron nasional ba juventude dala 14 ne’e Dr. José Ramos Horta mos koalia kona-ba problema arte marsiais ne’ebe akontese iha nasaun Timor leste, inklui xefe negosiador principal Timor-leste Xanana Gusmao hamutuk ho povu Timor-leste nia esforsu tomak hodi manan ita nia funu ne’e no hetan resultadu diak ba ita nia fronteira maritima ne’e rasik. Iha tinan 1974 depois akontesementu revolusaun dos cravos iha Portugal no nia kontinuasaun to’o mai akontesementu ida iha tasi tolu ne’ebe vizita husi Amo Papa João Paulo II iha Timor Leste no depois fila fali ba Vaticano ao mezmo tempu manas ona to’o massacre Santa Cruz.“Masakre ne’e hanesan asaun provokasaun ida atu hatudu ba mundu internasional nia matan, masacre ne’e mos fahe ba parte rua mak hanesan asaun pasifika, ka provokasaun no massacre ne’e responsabiliza husi militar Indonesia nia estrategia rasik,” Papel Juventude Iha Libertasaun da Pátria “Libertasaun da Pátria” hanesan kumpri direitu ho dever demokratiku ida. Iha loron nebe organizasaun RENETIL moris, hasai dokumentu ida iha nebe hateten: “A defesa intrasigente dos direitos inaliáveis do povo de Timor-Leste é um dever sagrado que tem de ser cumprido por todos os filhos do Heróico povo Maubere” . Iha tinan 24 nia laran halo funu hasoru okupasaun Indonesia iha Timor Lorosa’e, ema foin sa’e sira barak sai vitima, tanba sira nia envolvimentu direktu no aktivu iha prosesu libertasaun.

Jovens sira la’os tu’un de’it iha loron halo manifestasaun no internasionaliza kestaun Timor Lorosa’e hanesan forma presaun politik ida ba Jakarta hodi respeita direitu autodeterminasaun ba povu rai ne’e, maibe barak serbisu iha klandestina no balu halo parte frente armada. Sira nebe estuda iha Indonesia, hahu sobu politik nebe kleur ona Indonesia halo hodi blokeiu metin Timor ba rai seluk,“indonesiação do conflito de Timor-Leste”. Kestaun Timor Lorosa’e nebe Komunidade Internasional haluha ona, ho aksoens politik naba-naba jovens sira nian konsegue tau fila fali kestaun ne’e iha “destaques” imprensas ho foruns internasionais. Besik atu tama konsulta popular, estudantes sira UNTIM, liu husi DSMTT, asume papel importante tebes ida, la’os de’it iha mobiliza estudantes ho jovens sira hodi halo manifestasaun iha Dili maibe sai ba foho (postos no aldeias) halo kampañas no fo aten brani ba populasaun hodi tun tomak hala’o ninia direitu demokratiku iha referendum. Ikus mai atu hametin liu tan forsa jovens ho estudantes sira nian, iha tinan 1999, forma ona “Presidium Juventude Loriko Aswa’in” (PJLA).

Orgaun ne’e nudar estrutura ida ne’ebé halibur organizasaun juventude tomak
Ohin loron, organizasaun hamutuk 12 iha PJLA nia okos no hotu- hotu ninia objektivu buka ukun an ba rai Timor Lorosa’e. Juventude Nia Partisipasaun Hanesan Baze Fundamental Ba Itra Nia Rai Doben. Partisipasaun juventude nian iha funu ba libertasaun ho demokrasia la’os buat foun ida. Iha istoria hothotu, bainhira povu ida hetan hanehan maka’as, jovens sira sempre asume ninia papel nudar forsa vanguarda hodi halo trasformasaun. Ita bele hare jovens sira husi Correia do Sul, Filipinas, Afrika do Sul, Indonesia ho sst, assume sira nia papel ho determinasaun tebes halo funu hasoru ditadores hodi harii demokrasia iha sira nian rain. Tanba importante tebes papel juventude nian iha funu ba kore rai Timor Lorosa’e husi Indonesia nia liman kukun laran, iha “Convenção Peniche” iha tinan 1998, hamosu Departamentu Juventude nian, maibe to’o agora departamentu ne’e la la’o. Haree hanesan ulun boot sira CNRT nian, la ho laran tomak fo apoiu ba departamentu ne’e. Sekretariu nebe eleitu tuir demokrasia nian ba departamentu ne’e, ikus mai CNRT dada fila kargu ne’e husi nia liman la ho eksplikasaun ruma . Buat hothotu la’o arbitraria no kontra prinsipius no regras jogus demokratikas nian. Jovens sira terus tebes iha funu ida ne’e nia laran. Bispo Belo rasik rekuinse ida ne’e hodi hateten: “heroi lolos mak ema foin sa’e sira” . Iha Indonesia nia ukun okos, jovens sai vitima perseguisaun, torturas ho massakres. Maibe, bainhira hetan tiha libertasaun, ulun sira CNRT nian haree hanesan ladun valoriza no fo kunsiderasaun ba sira. Opsaun CNRT nian hili lia portugues ba lia ofisial Timor nian, marginaliza ema jovens sira at liu tan, tanba ema foin sa’e sira, iha nia maioria, la hatene ko’alia portugues. Bainhira ulun sira la fo atensaun, la prepara jovens sira no la fo izemplu diak, mak nasaun Timor nia abut la sei makaas, tanba sira nebe bolu “coluna vertebral” loron oin nasaun nian, ninia koluna vertebral ladun preparadu atu duka todan sira nebe sei husik ba sira nian kabaas.

Tenki rekuñese jovens nian sakrifisiu, maibe jovens mos labele mout de’it iha istoria uluk nian, maibe tenki ho neon boot hateke ba oin nafatin, kritiku, kriativu, inovador no brani hola inisiativas foun hodi bele halo mudansas no transformasoens iha sosiedade nia laran hodi bele hamosu dame no demokrasia iha Timor. Prepara an la’os hein de’it husi ulun sira, maibe tenki buka liu husi dalan oioin hodi tulun no prepara malu.

Heroi Lolos Mak Ema Foin Sa’e Sira
Juventude sira nia dedikasaun iha tempu ne’eba hanesan aksaun ida neebe rezeita total sistema ditadura militar Indonezia ne’ebé hanehan povu doben Timor oan sira hotu iha tinan naruk nia laran. Ema barak mak mate, oan kiak, inan aman laek, feto faluk no oan kiak. Moris terus susar sura la hotu durante tinan barak nia laran. FALINTIL metin nafatin ai-laran, Matenek nain sira ba liur maibe presiza juventude loriku as’wain sira baku hirus matan nafatin iha Vila laran, hamrik iha lina oin kumu liman hasoru kilat musan prontu fo an ba mate hodi duni Miilitar Indonezia tenki sai husi Timor-Leste. Ho ida nee atu hatete deit katak tenki hametin unidade hahu husi lider hotu no presiza poder judisiariu atu kria kondisaun atu hatun kiak iha Timor-Leste. Tan ne’e la seluk la leet, juventude atual sai nafatin kontinuadores atu halo mudansa ba buat hot-hotu ne’ebé verdade. Tamba sira nia mate Inspira hela sentidu espiritu Nasionalismu ne’ebe a’as ba ita no ba jerasaun sira tuir mai. Katak ita hotu tenki pronto hodi oferece ita nia enerjia, serbisu maka’as liu tan atu prence Ukun rasik An. So úniku ho ida, mak dalan husi ita hodi dignifika no valoriza, nudar espresaun sentimentu Onra riil ba sakrifisiu ita nia heroi Nasional sira.Atu conclui deit katak mai ita fo liman ba malu no neon ho laran ida deit hodi kontribui ba ita nia nasaun Timor-Leste ho domin paz unidadd e estabilidade. Jovens sira mai ita sai hanesan naroman ba ita nia nasaun Timor-Leste liu husi ita nia comportamento ne’ebé digno. Hatudo ba Mundo katak Juventude iha papel rasik ba ukun a’an.

Viva Juventude Loriku As’Wain
12 Novembro De 1991
12 De Novembro 2021

No More Posts Available.

No more pages to load.