ADVERTISEMENT

PDHJ Konsidera Sidadaun RI Hetan Eleitorál Ne’e Asuntu Sériu

Orlando Oqui - Justisa
Jornalista : Beatriz Belo
Editor : Orlando Oqui
  • Share
Provedór Direitu Humanus no Justisa (PDHJ), Virgílio da Silva Guterres “Lamuka”. Foto TP/Beatriz Belo

DILI (timorpost.com) — Provedór Direitu Humanus no Justisa (PDHJ), Virgílio da Silva Guterres “Lamuka”, relasiona ho sidadaun Repúblika Indonézia (RI) ne’ebé hetan kartaun eleitorál ne’e asuntu sériu.

“Maluk sira akompaña iha akuzasaun balun dehan katak iha sidadaun estranjeiru sira hetan fasilidade partidu balun atu mai iha ne’e, ba provedór ba asuntu ida ne’e asuntu sériu, ami hein katak entidade relevante ha’u hanoin iha ona medidas atu buka tuir, atu nune’e evita,” dehan Provedór Direitu Humanus no Justisa (PDHJ), Virgílio da Silva Guterres “Lamuka” liuhusi Konferénsia Imprensa iha edifísiu PDHJ  Kaikoli  Segunda  (15/05).

ADVERTISEMENT
SCROLL FILA BA NOTISIA


Nia dehan, Se kuandu iha duni, partidu sira ne’ebé involve tenke responsabiliza.

“Esforsu atu nune’e iha dia 21 la bele iha sidadaun estranjeiru sira ne’ebé utiliza fasilidade atu mai halo kampaña, Husi parte prevedoria ami nia delegasaun territorial sei buka hela informasaun kona ba ida ne’e, seidauk tama iha relatóriu ida ne’e, tanba buat sai tiha debate públiku ona provedór mós hakarak anúnsiumentu kona ba ida ne’e,” dehan nia.

Lee Mós :
Tuda Kona Nehan Arguidu EdS Ameasa Prizaun Tinan Lima

Entretantu iha ámbitu kampaña aberta Partidu CNRT nian iha Kampu Futeból Maliana, Kinta (11/05), sidadaun Indonézia ne’ebé hetan kartaun eleitorál ho pasaporte, Amelia Pereira, sa’e ba palku leten hodi fó sasin, katak pesoál balu iha Partidu KHUNTO fasilita eleitorál ba sira, para to’o tempu votasaun, sira tama husi Indonézia mai vota iha Timor-Leste.

“Ami hela iha Indonézia, momentu ne’e ami tama mai haree família iha Timor-Leste, komu ami laiha kartaun eleitorál, ne’ebé sira tawar mai ami, atu halo fodik kartaun eleitorál ho pasaporte, mais to’o tempu vota ami tama mai vota ba sira-nia partidu KHUNTO”, nia deklara perante militante, simpatizante no apoiante sira.

Nia dehan, sira barak loos mak hetan kartaun eleitorál ho pasaporte, maibé balun agora iha hela Atambua-Indonézia.

“Ami barak loos mak hetan kartaun eleitorál, balun la mai, ohin ami-na’in rua mak mai, ami ema ruanulu liu”, nia informa.

Relasiona ho aktu ne’e, Prezidente Partidu CNRT, Kay Rala Xanana Gusmão, konsidera Partidu KHUNTO la merese sai Partidu, tanba ne’e husu ba Komisaun Nasionál Eleisaun (CNE-sigla Portugés) ho Prezidente Repúblika, tenke haree ba situasaun ida ne’e.

Lee Mós :
TDD Julga Kazu Abuza Konfiansa Agravadu

“Ida ne’e Partidu KHUNTO hatudu loos katak la merese sai partidu, CNE ho Prezidente Repúblika, tenke haree ba situasaun ida ne’e, tanba timoroan atu ba trata pasaporte, dehan pasaporte laiha, keta halo ba sira fó hotu ba KHUNTO, fó pasaporte falsu. Ita-nia Estadu monu daudauk ona ba tahu laran no rai kuak, tanba ne’e mai hotu, ita salva tiha Estadu ida ne’e”, Xanana dehan.

Xanana hatete, aktu ida husi partidu KHUNTO nian ne’e kontra lei, tanba ne’e instituisaun relevante sira tenke toma atensaun.

“Ita-nia bin sira ne’e no alin feto sira ne’e ho tan ema liu ruanulu, sira sidadaun Indonézia, entrega kartaun eleitorál ba sira. KHUNTO nu’udar partidu entrega kartaun eleitorál ba ema sidadaun Indonézia atu vota ba KHUNTO, ne’e kontra Estadu no kontra lei, ida ne’e mak bolu atensaun ba CNE, lae ita arbiru de’it ona”, Xanana alerta.

Nia hatutan, “Ho ida ne’e hotu, dala-ruma dehan pasaporte laiha ona, dala-ruma bele fó pasaporte falsu arbiru de’it, ne’e sá Estadu ida mak hanesan ne’e. Partidu ida entrega kartaun eleitorál ba ema ne’ebé la’ós sidadaun Timor atu aumenta votu”, Xanana lamenta.

Lee Mós :
AMDIL Presiza Asegura Ema ho Moras Mental

Nune’e mós, Segundu Vise Prezidente Partidu CNRT, Gíl da Costa ‘Oan Soru’, afirma instituisaun Estadu hothotu no mós ba partidu polítiku sira hotu ne’ebé eziste iha Timor, labele halo hahalok sira ne’e, tanba timoroan mate liu rihun atus rua, la’ós tanba hahalok hanesan ne’e.

“Foin sa’e sira loke matan, labele tuir ema sira ne’ebé atu estraga rai ne’e, sira hanoin de’it sira-nia an, basta sira manan hodi hetan benefísiu, tanba ne’e Bobonaru oan sira, lalika fó ona votu ba partidu sira ne’ebé kakutak at hanesan ne’e iha rai ida ne’e”, Oan Soru apela.

Entretantu, hafoin sidadaun na’in-rua ne’e termina deklarasaun iha palku, Prezidente Partidu CNRT, Kay Rala Xanana Gusmão, tara kedan tais ba sira na’in-rua, hanesan sentidu agradesimentu ba sira-nia onestidade.

 

 1,568 total views,  3 views today

Oinsa Ita nia Reaksaun iha Notisia Nee?
Like
Love
Haha
Wow
Sad
Angry
You have reacted on “PDHJ Konsidera Sidadaun RI Hetan Eleitorál Ne&#…” A few seconds ago

Bele hare Video Seluk :
  • Share
ADVERTISEMENT
SCROLL FILA BA NOTISIA

Notisia Timorpost Seluk


Komentariu :
Timorpost.com. Respeita tebes Ita Nia opiniaun. Laran luak no uza etika bainhira hatoo opiniaun. Opiniaun iha Ita Nia responsabilidsde, tuir lei ITE.

Varanda
Kategoria
Video
Buka
Watch
Facebook
error:
Simu Notifikasaun Hosi Timor Post Online! OK No