DILI (timorpost.com) — Tribuna Distritál Dili (TDD) halo julgamentu ba krime abuzu konfiansa agravadu ne’ebé deskonfia komete husi arguidu JEMdAFdSS
Tuir akuzasaun Ministériu Públiku (MP) aprezenta ba tribunál katak, arguidu JEMdAFdSS ho lezadu Leonel Pinto Rangel sira nu’udar sósiu iha kompañia Ramkaby Grupu, Co. Lda., kompostu hosi arguidu mak diretór detentór 30%, lezadu ho detentór 25%, testemuña Teotonio Guterres Freitas ho detentór 25 %, testemuña Luciano Gomes ho detentor 10% no testemuña Carlito de A. Mali Code ho detentor 10%. Empreza refere dedika-an halo importasaun karreta no mákina pezada ba atividade konstrusaun sivíl.
Iha fulan Fevereiru tinan 2011 lezadu entrega 15.000.00 USD ba sósiu Teotónio Guterres hodi halo viajen ba Jakarta, osan hirak Laler ne’e uza selu ba despeza transporte, alojamentu no atu konfirma akordu ne’ebé arguidu halo ho empreza Hibaindo Armada Motor.
Osan ho montante indika iha leten, halo transferénsia dala rua primeiru transfere ho valor 2,500.00 USD no segundu ho valor 12,500.00 USD, osan hirak ne’e transfere liuhosi transferénsia bankária, hosi banku Mandarín Dili ba konta sósiu Teotónio Guterres nia kuiñada nu’udar ema sidadaun indonézia naran Chiquinha reside iha Indonézia.
Komún lezadu hein kleur karreta sira la to’o mai Timor, iha fulan Marsu 2011 lezadu halo viajen ba Jakarta hasouru sósiu Teotónio, arguidu no Bapak Machum, entretantu, sira informa ba lezadu katak buat hotu la’o di’ak no presiza tan osan 50,000.00 USD atu bele sosa karreta sira.
Iha momentu ne’ebá sira elabora akta ida iha Indonézia, kuandu arguidu hatudu akta ne’e ba lezadu, iha momentu ne’ebá kedas lezadu entrega osan valor 5,000.00 USD ba arguidu iha Jakarta, kuandu fila mai Timor lezadu halo tan transferénsia osan 45,000.00 USD ba konta Bapak Machum nia tuir orientasaun hosi arguidu. Osan hirak ne’e atu sosa karreta 10 ho midelo Hino Dutro, 130 Hd dump Truck.
Hafoin transfere tiha osan iha artigu 5, hein la iha konfirmasaun hosi arguidu, lezadu deside ba tuir fila fali arguidu iha Indonézia hodi halo konfirmasaun ba osan hirak ne’e, durante semana ida iha Jakarta lezadu halo kontaktu ho arguidu no Bapak Machum, maibé la hetan no la iha resposta hosi sira, la hetan resposta ruma hosi arguidu, entaun lezadu fila mai Timor, hosi Timor lezadu telefone ba arguidu iha Indonézia.
Entretantu, arguidu husu atu lezadu fila fali ba Indonézia karreta iha ona, ho razaun ne’e lezadu fila fali ba Indonézia, to’o iha ne’ebá loron 16/04/2011, akontese katak, arguidu ho Bapak Machum mai fali Timor.
Lezadu telefone sósiu Teotónio iha Timor ba tahan/prende sira na’in-rua hodi husu prosesu sosa karreta la’o to’o iha ne’ebé ona, sira na’in-rua halo deklarasaun ida entrega ba lezadu nia kaben ho Teotónio katak lezadu hein de’it iha Indonesia hodi foti karreta.
To’o data lezadu presta deklarasaun iha M.P. (01/10/2012) karreta sira la mai Timor, kuaze fulan-fulan arguidu sempre promete katak fulan oin karreta sira to’o. Objetivu sosa karreta 10 mai Timor depois fa’an fali entre sira fahe lukru.
Empreza Ramkaby Grupo, Co. Lda, atu halo importasaun motorizada mai fan iha Timor la’ós importasaun karreta pezada sira.
Entretantu, iha prosesu NUC 0005/16. PCCIC, arguidu em nome empreza Ramkaby Grupo, Co. Lda, selebra kontratu ida ho lezadu Alzira Ali Syabri Cai sidadaun Indonézia emprezáriu PT Ranca Buana Mitra hodi hatama motorizada mai Timor, hafoin motorizada 32 unidade mai tiha Timor arguidu nunka halo transferénsia osan ba lezadu iha Indonesia.
Hosi sósiu na’in-lima indika iha artigu 1 iha empreza Ramkaby Grupo, só úniku lezadu mak kontribui osan ba iha kazu ida ne’e.
Arguidu atua ho propózitu konkretiza ne’ebé determina lezadu entrega nia osan liu hosi transferénsia bankária ho valor total 65,000.00 USD.
Arguidu hatene katak osan hirak ne’e la’ós pertense ba nia, maibé, aktua no komporta nu’udar Diretór empreza, maibé gasta no aproveita osan hirak ne’e ba nia interese, hatene hetan osan hirak ne’e ho títulu la translativu hosi osan na’in, hatama karreta sira mai Timor nu’udar obrigasaun arguidu nia.
Arguidu halo ho forma livre, voluntáriu no konxiente, hatene momoos katak ninia konduta ne’e proibida no punivel hosi lei penal.
Ho hahalok hirak ne’e arguidu JEMdAFdSS nu’udar autór material ho forma konsumada ba prátika krime ida abuzu konfiansa agravadu previstu no punidu tuir artigu 256 no 257 númeru ida (1), husi Kódigu Penál.
Iha audiénsia julgamentu ne’e arguidu hili direitu ko’alia no deklarasaun, ba tribunal iha kompañia rua mak durante sira hala’o, maibé iha kompañia ida arguidu kaer hodi hatama karreta ne’e mak ativu, maibé kompañia ida seluk hamata motor ne’e la ativu ona.
“Osan ne’e los duni lezadu nia mai hatama iha ha’u hafoin ha’u mak lori ba sosa karreta ne’e, sira lori ha’u nia kompañia nia naran hafoin bele sosa karreta sira ne’e,” konfesa arguidu ba tribunál iha sala julgamentu TDD.
Arguidu ne’e konfesa tan, iha altura ne’ebá lezadu mak deve arguidu nia kompañia to’o agora la selu.
“Lezadu mak deve tan ha’u nia kompañia to’o agora la seluk, agora dehan fali ha’u deve fali, sira hanesan fó osan liuhusi ha’u nia kompañia mak sosa karreta. Ha’u nia kompañia ne’e, taka tiha, tanba ha’u servisu fali iha governu, entaun ha’u taka deside iha tinan 2016 too agora, iha altura ne’ebá, sira bain-bain hatama osan husi ha’u, maibé osan nia montante hirak ne’ebé mak hakerek iha akuzasaun ne’e ha’u la simu, tanba ne’e ha’u la hatene ida,” nia dehan.
Hafoin rona tiha deklarasaun husi arguidu Tribunál koletivu ne’e deside adia hikas prosesu ne’e ba fali loron seluk hodi kontinua rona lezadu.
Audiénsia julgamentu ne’e prezide husi Juiz Koletivu Arjentino Nunes, Alvaro Maria, Jose Gonçalves Ministériu Públiku reprezenta husi Prokuradór na’in-ida arguidu hetan asisténsia legál husi Advogadu privadu Américo Martins.
1,377 total views, 3 views today
Bele hare Video Seluk :
Subscribe to Timorpost
