DILI—Ministériu Públiku alega arguidu AQ ho pena multa, tanba halo agresaun fíziku hasoru fen lezada ECM.
Tuir akuzasaun husi ministériu públiku, ne’ebé lee sai husi tribunal, katak lezada ECM moris hamutuk hanesan fen ho la’en ho arguidu AQ iha tinan 2022, ne’ebé ekonómikamente iha dependénsia ba malu.
Iha loron 10 fulan Outubru tinan 2022, hale’u tuku 17:30 lokraik, iha Komoro Dili, arguidu AQ lori liman rua buti lezada nia kakorok, lori liman rakut lezada nia fuuk.
Konsekuénsia direta husi agresaun fízika ne’e, lezada ECM hetan moras iha ulun fatuk, moras iha kakorok, inklui kanek risku no ran sai uitoan, lezada ba halo tratamentu Saúde iha Sentru Saúde Vera Cruz.
Kauza husi problema ne’e tanba arguidu sai husi uma la fó hatene ba lezada, nune’e lezada buka tuir, arguidu hodi mosu agresaun fízika ne’e.
Arguidu AQ halo ho forma livre, deliberada no konsientemente, hatene katak, lori liman rua buti lezada nia kakorok, no lori liman rakut lezada nia fuuk, nu’udar meiu ne’ebé aptu hodi hamosu ofensa ba lezada nia isin lolon no saúde, Arguidu hatene katak, nia hahalok ne’e proibidu no punidu tuir lei Penál.
Tanba ne’e, ministériu públiku konstitui arguidu AQ, nu’udar autór materiál ho forma konsumadu ba prátika krime ofensa ba integridade fízika simples ho forma violénsia.
Hatán ba akuzasaun ne’e, arguidu konfesa ba tribunal, katak faktus balun loos no balun sala. Iha altura ne’ebá, arguidu joga karta ho kolega sira, lezada mosu ba rasta kedan arguidu nia fuuk, mak arguidu liki lezada nia liman.
“Ha’u joga hela karta, nia mai rasta ha’u nia fuuk iha ema barak nia oin, entaun ha’u liki liman mak liman kona nia, lezada mak lori fatuk tuda ha’u”, nia konfesa ba tribunal iha sala julgamentu TDD, Segunda (02/04).
Alende ne’e, lezada deklara katak, iha momentu ne’e arguidu halai husi uma ba subar iha feto ida nia koos, mak lezada buka tuir no hetan mak rasta arguidu nia fuuk, tanba sira na’in-rua hola malu fulan hitu de’it, arguidu halai tiha ba feto seluk.
“Ha’u rasta nia fuuk, tanba nia halai sai husi uma ba ho feto seluk iha koos mak ha’u hetan. Ami na’in-rua hola malu fulan hitu de’it nia halai tiha”, lezada deklara.
Hafoin rona tiha deklarasaun husi parte rua, liuhusi prosesu alegasaun ba kazu ne’e, ministériu públiku husu ba tribunal atu aplika pena multa ba arguidu, tanba arguidu nia hahalok ne’e prienxe duni elementu krime violénsia doméstika ho forma Ofensas ba Integridade Fízika Simples.
Maibé parte defeza, solisita ba tribunal, atu aplika ba tribunal atu aplika pena ne’ebé adekuadu ba arguidu, razaun tanba arguidu arrepende ba nia hahalok no foin primeiraves halo problema.
Tribunal rona tiha alegasaun husi parte rua, deside adia hikas prosesu julgamentu nee’ ba oras lokraik, hodi submete ba desizaun final.
Audiénsia Julgamentu ne’e prezide husi juiza Ana Paula Fonseca, ministériu públiku reprezenta husi prokuradór Napoleão Soares, no arguidu hetan asisténsia legál husi defensór públiku.
1,085 total views, 3 views today
Bele hare Video Seluk :
Subscribe to Timorpost
