DILI—jurista timoroan Sérgio Dias Quintas husu ba Ministériu Públiku atu prosesa pesoál saúde inisiál ZO, neebé deskonfia halo kobransa ilegál.
Tuir Sérgio, profisionál saúde hanesan servidór Estadu, kuandu deskonfia nia pratika irregularidade ruma ho aktu krime, nee laós atu prosesa dixiplinár ou hasai servisu, maibé tenke responsabiliza nia aktu nee.
Parte Ministériu Saúde bele aplika prosedimentu dixiplinár ruma, maibé laós too iha neebá deit, aktu neebé mak nia pratika ona nee, karik iha indísiu forte ba krime ruma, bele dehan katak iha korrupsaun pasiva ou ativa neebé mak prevee iha kódigu penal, Ministériu Saúde tenke enkamina ba nain asaun penal Ministériu Públiku.
“laós atu hasai deit nia ou aplika deit sansaun dixiplinár, maibé Ministériu Saúde tenke enkamina ba ministériu públiku, para atu bele prosesa ba iha tribunal, tanba iha mós responsabilidade kriminál”, Sérgio informa ba jornalista sira iha TDD Mandarin, Tersa (07/03).
Nia dehan, hanesan servidór Estadu, tenke responsabiliza ba servisu neebé mak iha, labele halo fali aktu ida nee.
“Ita hatene katak nia nuudar servidór Estadu, tuir loloos kumpre nia devér no obrigasaun nuudar servidór Estadu, tanba aktu neebé nia halo la hatudu ezemplu diak ba ita nia sosiedade”, nia lamenta.
Jurista nee hatete, labele dehan prátika aktu krime ruma, bele konsidera katak aktu neebé mak nia halo nee, la konstitui ona nia hanesan nuudar ema neebé mak iha indísiu forte ba iha krime korrupsaun pasiva ou ativa.
“tanba nee hau hanoin tenke kanaliza ba iha Ministériu Públiku, hanesan hau dehan laós atu prosesa deit ba prosesu dixiplinár ou hasai tiha deit, mais iha indikasaun forte katak nia pratika ona krime ruma, krime subornu ka krime korrupsaun pasiva ka ativa, importante mak halo investigasaun”, nia sujere.
Nia reforsa, tuir loloos nee Ministériu Saúde mak tenke ekamina prosesu nee ba iha Ministériu Públiku, labele halo deit prosesu dixiplina ou hasai nia, tanba tuir nia haree, ida nee iha indísiu forte, katak ajente saúde nee pratika aktu krime korrupsaun.
292 total views, 6 views today
