DILI—Tribunal Rekursu (TR) seidauk simu lista kandidatura husi partidu polítiku (Parpol), ne’ebé mak sei kompete iha eleisaun parlamentár tinan ne’e.
“Ate agora, seidauk iha lista kandidatura ida mai husi partidu polítiku ida ou koligasaun ruma, tama ba iha Tribunal Rekursu”, Prezidente Tribunal Rekursu, Deolindo dos Santos, hato’o asuntu ne’e hafoin partisipa iha komemorasaun loron nasionál veteranu nian iha sentru konvensaun Dili, Sesta (03/03).
Nia dehan, ba koligasaun nian, iha semana rua liubá, iha partidu rua mak hatama ona sira-nia pedidu ba Tribunal Rekursu, atu halo koligasaun pre-eleitorál, koligasaun ne’e naran Aliansa Demokrátika (AD), tanba ne’e iha loron Kinta (02/03), Tribunal Rekursu deside ona, no haruka sira mai ho lista ida.
Tribunal Rekursu bazeia ba regra, tanba ne’e sei simu lista kandidatura no koligasaun, tuir prazu ne’ebé mak determina ona, konta apartir husi entrada em-vigor dekretu Prezidente Repúblika nian.
Entretantu, foin lalais ne’e, PTR Deolindo informa katak, total partidu polítiku ne’ebé tuir ona iha eleisaun hirak liubá ne’e, no mós sira ne’ebé mak tama foun mai ne’e, hamutuk iha partidu 25. Partidu foun ne’e mak Os Verdes de Timor no PDS.
Entre partidu sira ne’e bele mai ho sira nia lista kandidatura rasik, no bele mós mai ho koligasaun, maibé Tribunal sei deside atraves nia plenáriu, tanba bainhira partidu polítiku sira aprezenta lista kandidatura, Tribunal sei halo verifikasaun ba rekizitu sira ne’ebé tuir lei partidu polítiku estabelese, inklui lei eleisaun parlamentár nian, para atu deside katak partidu ida ne’e ou koligasaun ida ne’e prienxe kritériu ka lae.
“Mais agora ita seidauk bele hatene dehan katak partidu ida ne’e prienxe kritériu ou la prienxe kritériu, partidu ida ne’e tuir eleisaun ka la tuir eleisaun, seidauk bele, so bele halo ida ne’e kuandu bainhira sira aprezenta mai, i tribunal apresia mak Tribunal sei deside no hatete”, nia hateten.
878 total views, 3 views today
