DILI (timorpost.com) – Bankada Partidu Kongresu Nasionál Rekonstrusaun Timorense (CNRT), hakaruk ba desizaun Tribunál Distritál Dili (TDD), nian kona-ba liberta Eis Ministru Interior, Longuinhos Monteiro hosi kazu asegura armas brankas iha nia rezidénsia.
Vise-Prezidente Bankada CNRT, Patrocíno Fernandes, hatete tuir Parlamentu Nasionál (PN), katak Tribunál nu’udar órgaun judisiál, lei no norma sira ne’ebé iha, tanba ne’e mak Tribunal atu liberta Eis Ministru Interior, Longuinhos Monteiro, ne’e nia direitu.
“Ita hatene katak órgaun judisiál nia mak iha kompeténsia tomak, atu haree ba problema hot-hotu iha nasaun laran, atu bele la’o ho situasaun ne’ebé pás no estabilidade liuhusi lei no normas,” nia hateten iha kna’ar fatin PN, Kinta (19/01).
Nia dehan, desizaun Tribunal Distritál Dili (TDD), hasai ona despaxu ne’ebé deside hodi liberta totál arguidu Eis Ministru Interior, Longuinhos Monteiro, tanba prosesu sira kona-bá buska no apreensaun hosi Polisia Sientífiku Investigasaun Kriminál (PSIK), iha loron Segunda (16/01/2023), konsidera ilegál,
“Kuandu ita haree katak ne’e aktus ilísitu, Estadu iha nia devér atu rekolla armas hodi prende, no husu responsabilidade ba ema ne’ebé halo krime/viola lei, maibé situasaun sira hanesan ne’e, ita iha lei, no ita iha prosedimentu adekuadu no prosedimentu própriu atu rezolve tuir lei haruka,” nia subliña.
Nia dehan, karakter sidadaun RDTL mak halo krime ka aktu ruma no lá tu’ir lei, signifika viola lei no Tribunal mak iha kompeténsia tomak oinsá ho prosedimentu. Tanba ne’e se Tribunal hola desizaun-ona dehan liberta arguidu ne’e, signifika iha ona razaun legais ruma.
“Sidadaun Repúblika Demokrátika Timor-Leste, ita hot-hotu iha lei nia okos, tanba ne’e ita tenke kumpre no hakaruk ba desizaun Tribunal nian ne’ebé iha”, nia hateten.
Iha parte seluk Vise Prezidente Parlamentu Nasionál, Luis Roberto, hatete PSIK mós halo detensaun ho lei, maibé ba fali Tribunal halo desizaun ida katak ilegál.
“Ita mós haree katak lei kódigu penal no lei nia prosesu hot-hotu ne’e responsavel husi ministériu públiku, nune’e bainhira halo detensaun presiza husi ministériu relevante hodi ba iha Tribunal, atu bele tau konsiderasaun legal”, nia hateten.
Maibé, nia dehan hanesan reprezentante povu iha Parlamentu Nasionál, husu nafatin ba Tribunal atu prosesa tuir lei, no prosesa nafatin ba sidadaun ne’ebé rai armas ba nia privadu.
“Maski nia nu’udar Eis titular, maibé lei proibidu ba sidadaun ida, atu rai armas nasaun ba privadu,” nia hakotu.
1,664 total views, 3 views today
Bele hare Video Seluk :