DILI (timorpost.com) — Governu Repúblika Popular Xina, liuhusi Embaixadór iha Timor-Leste, Xiao Jianguo, apoiu ekipamentu mákina teste Deoxyribo Nucleic Acidente (DNA), ba Polisia Sientífika Investigasaun Kriminál (PSIK) Timor-Leste.
Objetivu hosi apoiu ekipamentu mákina teste DNA unidade 10 ne’e atu fasilita prosesu investigasaun ba kazu krime iha territóriu Timor-Leste.
Ministru Justisa, Tiago Amaral, hatete Governu Repúblika Popular Xina, liuhusi nia Embaixadór iha Timor-Leste, entrega ekipamentu mákina ba iha Ministériu Justisa no mós ba iha Diretór PSIK ho nia direjente hotu.
Nia dehan, tuir loloos ekipamentu DNA, entrega iha tinan ida ou rua liubá, maibé tanba kestaun Covid-19, entaun adia fali ba loron seluk, nune’e ohin sira konsege entrega ekipa importante ba rai Timor-Leste.
Nia hateten, ekipamentu DNA ne’e, importante tebes ba asuntu justisa nian iha Tribunál ba prosesu kriminál nian no ba prosesu investigasaun nian, liuliu ba PSIK nian ausiliár ba iha area investigasaun.
“Antes ne’e, teste DNA ita haruka ba iha nasaun Portugal, maibé, ohin ba oin Timor-Leste sei la haruka tan ona teste DNA ba iha li’ur, tanba ita iha ona ekipamentu teste DNA, bele teste ba asuntu hirak ne’ebé kazu krime ou ba kazu sivíl,” dehan Ministru Tiago, iha auditorium Ministériu Justisa, Kaikoli, Segunda (12/12).
Nia esplika, teste DNA ba kazu sivíl, bain-bain ema dehan, rekoñese oan, inan no aman ne’e oinsá liuhusi ran, nune’e mós ba kazu krime hirak ne’ebé presiza teste DNA, hodi halo rekolamentu ba dadus provas sira ne’e, importante tebes-tebes para depois hato’o ba iha Ministériu Públiku, bele aprezenta no halo akuzasaun iha Tribunál, atu buka verdade.
“Tanba ne’e, Ministériu Justisa hamutuk ho Diretór PSIK, Adjuntu PSIK no mós ho xefe departamentu hotu iha PSIK nian, ami agradese tebes ba apoiu ne’ebé Governu Xina fó bazeia akordu kooperasaun iha tinan 2018,” nia afirma.
Alende ne’e nia dehan, Governu Repúblika Xina, la’ós apoiu ekipamentu DNA de’it, maibé sei fó apoiu asisténsia ba rekursu umanu kona-ba oinsá atu hakle’an liután koñesimentu ba iha area DNA nian.
Iha fatin hanesan, Diretór Nasionál PSIK, Vicente Fernandes Brites, hatete antes iha ekipamentu ne’e, sira-nia parte prepara tiha ona rekursu umanu, iha espesialista superior na’in-rua, ne’ebé halo selesaun iha tinan kotuk, sira mós halo formasaun estájiu durante tinan ida no hetan ona tomada pose husi Ministru Justisa.
“Agora ita hein de’it ekipamentu DNA no sei instala husi Embaixada Xina nia espesialista sira, depois ita avansa ba formasaun no iha tinan 2023, ita espera ekipamentu nee bele funsiona no bele ajuda fó apoiu ka ausiliár ba Tribunal no ba Ministériu Públiku, liuliu ba krime sira ne’ebé relasaun ho teste DNA,” dehan Diretór PSIK.
Nia afirma, ekipamentu DNA ne’e, foin primeira-vés eziste iha Timor-Leste. Durante ne’e ita halo diplomátiku ho Portugal kona-ba teste DNA. Tanba ne’e, iha tinan 2023 mákina ida ne’e funsiona, entaun diplomátika ne’e laiha ona.
“Kona-ba fatin mak hanesan iha Hospital Nasionál Guido Valadares, tuir akordu ne’ebé PSIK ho Ministériu Justisa halo”. nia hateten.
Nia konta, Ekipamentu DNA ne’ebé ohin sira simu hamutuk 10, iha faze tolu, simu depois halo analiza ba nia amostra no ikus liu mak hasai nia rezultadu.
“Kona-ba instalasaun fatin ne’e, ita presiza orsamentu hamutuk 100 mill hodi halo instalasaun, agora ita prevee ona orsamentu ba ida ne’e, karik iha tinan 2023 orsamentu retifikativu, bele prevee tan atu nune’e bele kompleta ba 100 mill, para halo instalasaun ba ida ne’e,” nia hakotu.
Enkuantu iha serimónia entrega ekipamentu DNA ne’e, husi Embaixadór Xina iha Timor-Leste, entrega ofisiál ba iha Ministériu Justisa (MJ), Tiago Amaral.
1,474 total views, 3 views today
Bele hare Video Seluk :
Subscribe to Timorpost
