DILI (timorpost.com) – Inan Faluk Verónica Xavier, halerik ba hela fatin, hafoin nia simu notifikasaun husi Tribunál, iha loron Sesta (11/11), hodi hasai obrigatóriu nia ho nia-oan no mós bei-oan sira iha aldeia Bedois, Suku Kamea, Postu Administrativu Kristu Rei, Munisípiu Dili.
Nia hatete, iha semana ida liu ona mak nia ho nia-oan no Bei-oan ne’ebé foin moris semana ida liu ne’e, hela de’it ho labarik estudante sira iha viziñu.
“Ami semana ida liu ona, ami terus hanesan ne’e, ha’u ho ha’u-nia Bei-oan João, sei Toba iha uma mahon, ne’ebé viziñu oferese ba ami, maibé ha’u-nia oan no Bei-oan sira seluk ne’e toba de’it iha lona okos, dada de’it lona ne’ebé foin Sae Parlamentu oferese ne’e,” Verónica hato’o lia hirak ne’e ba Media online Timor Post ho matan been iha Bedois, Segunda (21/11).
Inan faluk ne’e hatete, nia parte la husu buat seluk ba Estadu, maibé nia husu mak oinsá bele resolve lalais kazu ida ne’e, atu nune’e sira la bele terus de’it iha udan laran.
“Ha’u husu ba Estadu no nai-ulun sira, oinsá atu rezolve lalais problema ida ne’e, tanba ha’u idade ferik ona, ami barak hanesan ne’e hela ho viziñu sira no halo de’it baraka oan hodi hela iha ema viziñu nia uma, ami sente la di’ak,” nia preokupa.
Nia dehan, daudaun ne’e parte rede ba rai mak ajuda ona sira, hodi buka advogadu privadu na’in-rua, atu ajuda sira prosesa kazu ne’e.
“Rekursu ami halo ona hodi hasoru senhor Alexandre do Santo, maibé se bele ami hela lai iha ami-nia uma refere, karik aban-bairua ba Tribunál mak lakon ami sai mós di’ak, maibé agora ami terus los ba hela fatin, kondisaun hela mak hanesan ne’e,” nia hateten.
Alende ne’e nia dehan, momentu deputadu Bankada KHUNTO, Luis Riberto mak ajuda sira buka advogadu ida ho naran Ismael Asosiação, maibé tuir sira haree advogadu ne’e laiha seridade ho kazu ida ne’e.
Iha fatin hanesan, oan feto husi inan faluk ho naran, Joana de Jesus, hatete loron rua ne’e sira Toba la di’ak, tanba udan, entaun udan been sulin tama lona laran.
“Banhira udan, ami Toba la di’ak, ami tenke hader hodi kontrola ami-nia oan sira no udan mós ami han la di’ak, tanba udan been tama de’itit, dala-ruma ema viziñu seluk mak bolu ami ba deskansa iha sira-nia uma,” nia dehan.
Ikus liu nia informa, durante ezame iha Eskola ne’e, sira-nia oan ba de’it tuir ezame, maibé labarik sira la estuda tanba kadernu sira aat hotu, tanba ne’e sira-nia parte seidauk bele dehan nia oan sira ezame di’ak ka lae, hein de’it rezultadu husi valor mak foti hatene.
2,002 total views, 3 views today
Bele hare Video Seluk :
Subscribe to Timorpost
