DILI (Timor Post) – Ministru Justisa, Tiago Amaral, hakfodak tanba Tribunal Distrital Dili (TDD), fó de’it TIR (Termu Identidade Rezidénsia) ba suspeitu sira kazu droga, no kondena sira la tuir Lei droga ne’ebé vigor iha Timor-Leste.
“Nu’udar Ministru Justisa hatene no komunidade tomak hatene katak ita iha Lei espesiál kona-ba ilísitu droga ninian Lei ne’e mak N⁰. 02/2017 ne’ebé regula droga,” nia hateten iha Palásiu Governu, Kuarta (17/08).
Nia esplika, iha Lei ne’e nia laran define, ema sira ne’ebé tuur de’it iha uma mak konsumu droga de’it mós ameasa kadeia husi tinan 2 to’o tinan 12.
“Lei ida ne’e ko’alia lia espesiál ba droga N⁰. 02/2017, no Lei ne’e agora aplika no vigor hela iha Timor-Leste, no Lei ne’e kalan ema ne’ebé tuur de’it iha uma ka iha servisu fatin de’it mak kusumu mós krime no ameasa kadeia tinan 2 to’o tinan 12, iha lei espesiál ne’e nia laran mós iha artigu sira ne’ebé ninia pena ne’e maka’as tebes,” hateten nia.
Nia hatene tanba ne’e krime droga la’ós krime baibain ona, tanba ida ne’e bele fó ameasa ba joven sira-nia vida no nasaun ida ne’e nia vida ba risku.
“Tanba ne’e ami hakfodak bainhira prokurador sira lori fali artigu ida ne’ebé ninia pena ne’e la maka’as mak kondena suspeitu sira droga ne’e, tanba ezemplu iha artigu 07 husi Lei N⁰ 02/2017 kona-ba droga ne’e dehan, sira tuur de’it iha uma mak uza mós krime ona ameasa kadeia tinan 2 ba to’o tinan 12,” reforsa nia.
Ho ida ne’e nia parte mós konsidera Prokuradór sira la uza Lei espesiál droga nia mak uza hodi akuza suspeitu sira ne’e, no ladún fó normas ba Lei droga ne’ebé vigor iha Timor-Leste.
“Ministériu Justisa nota no sujere ba Ministériu Públiku presiza tau atensaun didi’ak ba Lei N⁰.02/2017 iha artigu hitu ko’alia momós iha ne’ebá, tanba ne’e prokurador sira presiza haree fali,” hateten nia.
1,471 total views, 6 views today
