Jurista Júlio Crispin Haktuir Kona-ba Fundu Petrolíferu Lakon Milaun $88 iha Janeiru 2021 no Prosesu Levantamentu OJE

by -1.521 views
Amu Júlio Crispin

Timor Post (12/03/2021)—Jurista senior Padre Júlio Crispin haktuir relatóriu husi Banku Sentral Timor Leste (BCTL sigla Portugués), iha fulan Janeiru 2021 hatudu, Timor Leste lakon fundu petrolíferu milaun $88 husi total bilaun $18,99.

“Ita nia fundu petrolíferu taka iha fulan dezembru 2020 bilaun $18,99, iha Janeiru 2021, tuir relatóriu banku sentral nian iha fulan ne’e Timor Leste lakon milaun $88,” Padre Crispin subliña iha nia intervensaun iha debate ho tópiku impaktu atrazu levantamentu OJE 2021 ba dezenvolvimentu, iha Dili Democracy Club (DCC)-Tve, semana hirak liu ba.

Tanba ne’e, Padre Crispin konsidera deklarasaun sira katak governu labele ansi foti osan hodi hetan lai funan ne’e invalidu.

“De faktu iha fulan janeiru osan lakon. (katak) atu manan ka lakon ne’e la depende ba polítiku sira hatete, depende ba merkadu nia evolusaun i depende ba produsaun petrolíferu. Tanba ne’e, dehan husik lai osan funan ne’e inválidu,” Padre Crispin hatete.

Maske nune’e, Padre Crispin dehan, hein katak osan ne’ebé lakon bele hetan fali iha fulan hirak tuir ne’e konforme merkadu finanseiru.

Padre Crispin nia intervensaun esplika klean kona-ba reseita prinsipál ba Orsamentu Jerál Estadu (OJE) maka fundu petrolíferu, tuir fali impostu no impréstimu.

“Ida ne’ebé ita kestiona atualmente ne’e maka reseita husi fundu petrolíferu ba OJE 2021,” nia klarifika.

Haree husi prosesu levanatamentu husi istória governu anterior sira, normalmente iha trimester dahuluk laiha levantamentu, trimester daruak iha fula Abril-Maiu-Juñu maka komesa  iha levantamentu, i iha Jullu to’o Setembru dala ida, ikus liu Dezembru.

Tanba ne’e, Padre Crispin dehan, haree ba OJE 2020 liu ba iha levantamentu husi fundu petrolíferu dala tolu, iha trimester daruak foti dala ida milaun $250, iha trimester datoluk foti milaun $169, no ikus liu iha fulan Outubru-Dezembru foti milaun $466.

Husi total osan ne’ebé governu foti ikus iha 2020 nian ne’e, Padre Crispin dehan, sé la ezekuta hotu iha fulan hirak ikus ne’e katak, osan restu ba tinan ne’e nian sei iha. Nune’e, nia esplika, tuir regra, iha konta tezoru mínimu tenke iha milaun $200. Katak, sé iha de’it ona total osan ne’e maka Ministru FInansas buka dalan hodi aumenta husi reseitas tolu ne’ebé sita iha leten ne’e ida, inklui impréstimu no impostu karik seidauk bele, maka dalan úniku rekore ba fundu petrolíferu.

Nia hatutan, sé iha kaixa ka konta tezoru liu hela milaun $200 maka Ministru FInansas seidauk iha nesesidades atu husu.

Tanba ne’e, Padre Crispin dehan, bazeia ba deklarasaun Ministru FInansas nian iha fulan hirak dahuluk tinan 2021 katak, iha konta tezoru sei boot liu milaun $200.

Husi ne’e Padre Crispin dehan, serake iha duni nesesidade atu Ministru FInansas tenke levanta ona OJE 2021 depende ba ejekusaun iha fulan Janeiru to’o Fevereiru husi konta tezoru ne’e hamutuk hira hodi provoka regra sira kona-ba kestaun ne’e.

Entretantu Padre Crispin mós klarifika kona-ba hafahe fundu petrolíferu sira, atualmente bazeia ba regra, fundu petrolíferu iha Banku Federal Amérika ne’e iha de’it 62% husi total reseita ne’ebé iha, 34% iha asoens ka iha kompañia internasionál sira, no 4% mak sai alternativa ba BCTL atu tau iha instrumentu sira ne’ebé governu bele foti lalais.

Katak, atu foti osan iha Banku Federal Amerika ne’e BCTL nia servisu. Governu liuhusi ministériu finansas bainhira osan iha konta tezoru laiha bele husu de’it ba BCTL foti osan husi 4% ne’ebé iha ba OJE.

To’o notísia ne’e públika, Timor Post seidauk hetan klarifikasaun husi Ministru Finansas no BCTL. (cao)

No More Posts Available.

No more pages to load.