Júlia sei Haloot iha Semitériu Militár, Lere Hein Investigasaun

by -1.595 views
Matebian Júlia da Conceição

Jornalista Jaime Pires / Editór Noémio Falcão

DILI (Timor Post)— Júlia da Conceição nu’udar membru husi Komponente Naval, FALINTIL-Forsa Defeza Timor Leste (F-FDTL) tuir planu sei ba haloot iha semitériu militár nian iha Metinaro, Dili.

Júlia ho nia kolega na’in-5, Tersa (14/08/2021) viajen husi Dili ba Suai hodi hala’o kna’ar maibé to’o Suku Nunu-Moge, Postu Administrativu Hatubuiliko,  Munisípiu Ainaru, hetan asidente karreta baku fila tun ba rai naruk.

Júlia hetan pankada maka’as no bainhira halo evakuasaun ba ospitál Ainaro maibé la konsege salva. Inkuantu membru mane na’in-5 seluk hetan kanek todan no kmaan.

“Ha’u lori ha’u nia naran ha’u nia família nia naran no instituisaun nia naran ha’u fó ha’u nia sentidu kondolensia ba família matebian ninian,” Xefe Estadu Maior Jenerál F-FDTL, Tenente Jeneral Lere Anan Timur subliña ba Jornalista sira iha Kuartel Jeneral F-FDTL, Fatuhada, Dili, Kuarta (25/08/2021).

Lere dehan, insidente ne’e presiza hetan investigasaun klean.

“Tama ona ba investigasaun mak hatene, asidente ne’e tanba kondutor ka ba kondisaun karreta ninia ka oinsá ami sei hatene,” Lere subliña.

Lere mós dehan, matebian sei iha Ainaro hamutuk ho família sira, kalan ida hamutuk ho komponente Naval depois sei ba halot iha Metinaru.

“Ha’u simu informasaun husi nia Komadante katak kalan ida hamutuk ho nia família, depois kalan ida hamutuk ho komponente ne’ebé mak nia pertense ba no ikus sei hakoi iha semiteriu militár iha Metinaru,” Lere hatete.

Lere informa, ba sira ne’ebé mak kanek hodi kalan kedas ekipa médiku husi militár nian dezloka ona ba fatin no sira sei haree no sei lori mai iha Dili hodi halo tratamentu intensivu.

No More Posts Available.

No more pages to load.