Julgamentu Kazu Pedofilia Kontinua Aban, Xanana ho Eis Padre Amerikanu Fahe Malu Hafoin Sai husi Tribunal Oekusi

by -285 views

Timor Post (22/02/2021)—Juis koletivu, Yudi Pamukas, Hugo da Cruz Pui no Evangelino Belo ne’ebé ne’ebé tesi lia ba kazu pedofilia ka violasaun seksual hasoru labarik sira iha orfonatu Topu Honis, deside julgamentu kontinua ba loron Tersa (23/02/2021).

Iha prosesu julgamentu ba loron dahuluk ne’e, parte sira hato’o ida-idak nia rajaun, maibé ikus mai juis koletivu  hakotu julgamentu kontinua ba aban, tanba mosu pro no kontra maka’as kona-ba proposta suspende atividade orfonatu Topu Honis.

Defeza husi arguidu eis Padre Richard Dascbach, Pedro Aparicio la fó fatin ba proposta husi Ministériu Públiku nian ne’e.

Suspeitu ba akujasaun ne’e akompaña husi Líder Nasionál Kayrala Xanana  Gusmão, hafoin julgamentu ba loron ohin nian, sai husi Tribunál rejiaun ne’e nian, ida-idak sa’e karreta ne’ebé la hanesan.

Tuir observasaun, sai husi aredor tribunál nian, Xanana sa’e nia karreta ne’ebé tula ho husi Dili no Richard sa’e karreta hamutuk ho Komandante PNTL Oekusi, Mateus Assunção Mendes.

“Ami sei mai fali iha ne’e aban tanba julgamentu kontinua tan. Ami mai asisti husi dook de’it tanba julgamentu ne’e taka ba públiku,” fonte Atoni oan ne’ebé hiit-an mós ba akompaña situasaun iha Tribunál Rejiaun Oekusi.

Antes ne’e, Xanana hatete, defende Eis Padre ne’e tanba hare iha buat barak mak kahur iha kazu ne’e, maibé bainhira loos duni katak Eis Padre ne’e halo sala nia mos kondena.

Antes ne’e mos, atual Diretora Topu Honis, Liliana Tarung ba Timor Post konfesa, iha konspirasaun ne’ebé involve ema lubuk ida hodi hases Richar husi orfonatu Topu Honis. Meius barak ema halo hodi hamonu Richar maibé la konsege ikus mai ho akujasaun kona-ba pedofilia.

Tanba ne’e, Liliana hatete, entrega ba justisa atu hatúr lia loos.

Entretantu, Liliana mós haktuir, nia rasik mos kumpri ona julgamentu iha Tribunál Rejiaun Oekusi ba-dala-rua tanba hetan akujasaun oioin katak nia abandona no tortura labarik sira iha orfonatu.

Ho akontesimentu sira ne’e, Liliana reforsa katak, iha konspirasaun husi ema sira ne’ebé laran moras ba nia ho Richar durante dezenvolve orfonatu Topu Honis.

“Sira barak husi liur no na’in-ida eis Topu Honis ne’ebé la satisfeitu ho ha’u nia pozisaun agora (Diretora Topu Honis),” Liliana haktuir no dehan, ba tinan ida ne’e sura nia servisu iha Topu Honis durante tinan 26 ona.

Richard Dascbach, moris iha loron 26 Janeiru 1937 iha Pennsylvanian, Estadus Unidu Amérika (EUA) lori misaun evanjelizasaun Katólika tama iha Oekusi iha tinan 1972.

Nia ordena sai padre iha tinan 1965, no liu tinan rua de’it, nia mai ona Nusa Tenggara Timur (NTT) no ikus liu tama ba Ambeno iha tinan 1972.

Invazaun Indonézia mai Timor-Leste, nia hela iha Oekusi to’o tinan 1999 no konsege subar joven lubuk ida hosi atakasaun pro-integrasionista.

Durante hala’o misaun evanjelizasaun, nia harii uma mahon ida ho naran Topu-Honis (Guide To Life) iha tinan 1993 ho objetivu atu fó mahon ba labarik kbi’it la’ek sira.

Tuir artigu ne’ebé fó sai iha Tatoli, rezultadu hosi orfonatu Topu Honis, konsege lori nia amigu sira hosi Amérika hodi halo adosaun ba Ambeno oan na’in-hitu (7) oras ne’e eskola ramata ona. Sira-nia ensinu superiór iha universidade balun iha Amérika, no balun iha Austrália, inklui mós balun oras ne’e iha deviza boot iha instituisaun F-FDTL no instituisaun Estadu seluk tan.

Richard akuzadu ho kazu pedofilia ka halo abuzu seksuál hasoru labarik minoridade.

Entretantu antes ne’e, Arsebispu Metropolitana Dili, Don Virgílio do Carmo da Silva, SDB, lihosi konferénsia imprensa iha Cámara Eclesiástica, Lecidere, Dili, subliña, entrega prosesu ne’e ba parte justisa hodi hatúr lia loos.

Kazu ne’e to’o mós iha Roma, Amu Papa foti ona desizaun hodi hasai Richard husi kargu nu’udar Padre.

Nune’e mós liga ho kazu ne’e, Don Virgílio mós deside ezonera Padre Herminio de Fátima Gonçalves husi kargu nu’udar Diretór Komisaun Justisa no Paz Dili nian.

“Ha’u nu’udar bispu deside atu ezenora amu Hermino de Fatima Gonçalves hosi nia kargu nu’udar Diretór Komisaun Justisa no Paz Dili nian tanba ligasaun ho kazu ida-ne’e. Ha’u deside atu hapara nia hosi servisu tanba ho razaun buat ne’ebé nia halo iha nia relatóriu hetan indíjiu ruma kona-ba alegasaun akuzasaun hasoru Ministériu Públiku nia investigasaun,” Don Virgílio hatete.

Richard atualmente kumpre hela prosesu judisiál (Termu Identidade Rezidénsia) iha Dili laran hodi hein prosesu julgamentu tuir mai kona-ba alegasaun kriminál hosi Ministériu Públiku.

Entretantu iha fulan kotuk, bainhira Xanana hala’o vizita ba Eis Padre Richard nia rejidénsia iha Dili hodi fó votus parabens ba nia aniversáriu ba-dala-84, mosu krítika manas iha públika tanba konsidera Eis Padre Richard nu’udar kriminozu ne’ebé la merese hetan atensaun husi Líder Nasionál hanesan Xanana.

Xanana nia oan mós hakerek karta ne’ebé públika husi nia ama Kirsty Sword Gusmão, preokupa tebes Xanana nia asaun ne’e.

Maske nune’e, mosu mós komentáriu seluk ne’ebé konsidera Eis Padre Richard sei inosente tanba só tribunál de’it maka bele kondena sidadaun ida ka hatúr lia loos ba akujasaun hotu liuhusi investigasaun ne’ebé klean.

Maske nune’e, ho baze lei kanóniku, Santasé ezonera ona Richard nu’udar Padre. (cao)

 

No More Posts Available.

No more pages to load.