Julgamentu iha TDB La’o Normal

by -273 views
Jumiaty Maria Freitas

DILI (Timor Post)— Juiza Administradora Tribunal Distritál Baukau (TDB), Jumiaty Maria Freitas, informa, maski governu aplika konfinamentu domisiliáriu jerál, maibé prosesu julgamentu kontinua la’o normal.

Nia hatete, razaun tribunál kontinua halao ninia atividade normal tanba iha regra konfinamentu obrigatóriu la bandu atividade tribunal, nune’e juis sira sei hala’o servisu normal hanesan bai bain.

“Maski nune’e ita sei hala’o atividade normal, tanba iha esepsaun balu katak governu la bandu atividade julgamentu,” hatete Juiza Administradora TDB, ba Timor Post via telefone, Tersa (31/08).

Juiza haktuir katak, juis sira iha tribunal Baukau, hotu-hotu sei goza ferias Judisiáriu, tanba nee koloka de’it juis turnu mak atende prosesu urjente kada loron.

“Agora daudaun ami sei la’o tuir prosesu urjente de’it, tanba hanesan ita hotu hatene katak tribunal sei iha faze ferias hela, entaun kada loron ita koloka de’it juis turnu ida-ida mak atende prosesu,” dehan nia.

Enkuantu, kona-ba dadus, prosesu julgamentu kazu urjente iha tribunal Baukau, Juiza ne rasik ladún lembra númeru serteza.

Maibé nia dehan, hosi total juis na’in 6, durante períodu ferias atende barak liu mak kazu providénsia kautelar ho natureza sivíl, seluk krime Ofensa grave no Arma Branka.

Ikus nia apela ba sosiedade no juis sira seluk, katak kontinua la’o tuir protokolu saúde mundiál nian, ne’e nafatin prevene pandemia Covid-19, hodi labele da’et. (Jxy)

No More Posts Available.

No more pages to load.