JSMP-Alfela Diskute Alterasaun Kódigu Penal no Insestu

by -305 views
Judicial System Monitoring Program (JSMP), Alfela no parseiru sira ne’ebé durante ne’e servisu iha advokasia halo hela enkontru, iha Salaun JSMP, Kuarta (23/03). Imajen TP/mariano abi

(Reportajen Estaziadu Mariano Abi/Asistente Editor Hermenegildo da Costa Tilman)

Dili (Timor Post)— Judicial System Monitoring Program (JSMP) no Alfela realiza enkontru ho parseiru sira ne’ebé servisu iha area advokasia, hodi diskute koona-ba alterasaun kódigu penal ne’ebé iha ligasaun ho asuntu insestu iha prosesu halo lei.

Tuir advokasia JSMP, Jose Moniz, hatete, enkontru ne’e atu bele tau hamutuk forsa liu-liu haree fila fali kona ba planu advokasia ne’ebé mak halo kleur ona.

“Ami kontinua buka ko’alia hamutuk, tau hamutuk hanoin, no atualiza dadus sira kona ba asuntu insestu, depois ami aprezenta fali ba Parlamentu Nasionál, hodi sira bele konsidera asuntu ne’ebé mak sai hanesan públiku nia preokupasaun, liu-liu iha relasaun asuntu insestu nian,” nia dehan, ba jornalista sira iha Salaun JSMP, Kuarta (23/03).

Nia hatete, iha mós asuntu seluk ne’ebé konsege ko’alia maka kona-ba oinsá haree partisipasaun sosiedade sivíl no públiku nian iha prosesu halo Lei.

“Partisipasaun públiku nian no sosiedade sivíl nian iha prosesu halo Lei ne’e, importante tebes hodi fó idea kona ba ezbosu lei sira, atu nune’e ita nia Lei sira ne’e bele duni reflete ita nia situasaun Timor nian, la’ós adapta de’it hosi nasaun CPLP nian,” nia dehan.

Nia haktuir, kestaun ida ne‘e importante tebes atu kolia hamutuk atu haree posibilidade rejimentu Parlamentu Nasionál nian, karik iha rejimentu ne’e bele obriga deputadu sira, hodi bele halo konsultasaun kualkér ezbosu Lei sira, atu nune’e ita nia Lei sira ne’e bele duni reflete ita nia situasaun Timor nian. (Lee Notísia Seluk Iha Jornál Timor Post/Asesu YouTube Timor Post)

No More Posts Available.

No more pages to load.