Joven Iha Venilale Prende PNTL Nia Karreta

by -6.599 views

(Jornalista Jaime Pires/Editor Suzana Cardoso)

DILI (Timor Post) – Komandu Jerál Polísia Nasionál Timor-Leste (PNTL), Liuhusi Portavós Superentendente Xefe, Arnaldo de Araújo rekoñese joven balun iha Postu Administrativu Venilale, Munisípiu Baukau prende (PNTL) nia karreta.

Arnaldo Araújo rekoñese lia hirak ne’e, hafoin Jornalista sira konfirma kona-ba asuntu ne’e iha Komandu Jerál PNTL, Kaikoli Kuarta (04/11).

“Los duni ohin Ita Boot sira husu katak iha akontesimentu balun iha Venilale ne’ebá. Maibé, Polísia sei halo hela investigasaun ba kazu ida ne’e”, dehan Arnaldo hodi hatutan, daudaun ne’e sira sei halo investigasaun atu hodi bele hatene tanba saida mak ida ne’e bele akontese.

Portavós ne’e husu atu fó tempu ba PNTL hodi bele buka tuir motivu insidente ida ne’e, hafoin mak bele fó sai fali Informasaun klaru ba komunidade sira no mós ba públiku tomak. Tanba akontesimentu ne’e foin maka akontese.

Tuir informasaun ne’ebé mak Timor Post rekolla katak, daudaun ne’e PNTL Munisípiu Baukau liuhusi eskuadra Venilale detein ona suspeitu na’in ida ka na’in rua. Kazu ne’e akontese iha Postu Administrativu Venilale, Munisípiu Baukau, iha loron Tersa, (02/11), hafoin PNTL liuhusi eskuadra PNTL halo hela servisu relasiona ho loron Matebian Finadu ne’e.

Enkuantu Timor Post mós tenta kontaktu ba Komadante PNTL Munisípiu Baukau, Superintendente Xefe, Armando Monteiro, hodi konfirma asuntu refere maibé nia parte seidauk bele fó informasaun tanba, sei partisipa iha serimonia funebre Amu Bispu Don Basílio do Nascimento nia iha Igreja Katedrál Baukau.(***)

 

No More Posts Available.

No more pages to load.