Kazu VD Mosu Kauza Hosi Teknolojia

by -64 views
Juis Afonso Carmona

Reportajen Cesaltina Ximenes / Editór Mateus da Cruz

DILI (Timor Post)—Juiz Administradór Tribunal Distritál Dili, Afonso  Carmona, hatete, kazu Violénsia Doméstika (VD) ne’ebé oras ne’e rejista aas iha Tribunál Distritál Dili (TDD), maioria akontese kauza hosi teknolojia.

“Uluk violénsia nee mosu dehan ekonomia uma laran, mas ohin loron violénsia mosu tanba kauza husi teknolojia, uza la tuir nia dalan deskonfia malu, ikus mai hamosu violénsia,” dehan Juiz Administradór Tribunal Distritál Dili, Afonso  Carmona ba Jornalista sira iha TDD, Tersa (15/06).

Carmona, hatete, kazu ne’ebé mak akontese dala barak fen no la’en ne’ebé uza teknolojia la tuir nia dalan ikus mai deskonfia malu. Hafoin la’en halo agresaun ba fen, no rezultadu ikus fen sente la seguru tenke hato’o keixa ba Ministériu Públiku no julga iha tribunal.

Tan ne’e, tuir Carmona, atu redús númeru violénsia doméstika dalan di’ak liu maka parte igreja no estadu presiza halo presiza halo sosializasaun oinsá prevee ne’e kazu VD.

“Violénsia ne’e mosu kauza mós husi menus moral iha uma laran, menus mós informasaun hosi igreja, tanba ne’e ami husu atu iha espíritu habelar informasaun ba sarani sira, ho liafuan domin no pás,” dehan Carmona.

Enkuantu tuir observasaun ne’ebé Timor halo iha tribunal Dili, nota katak krime violénsia doméstika ne’ebé julga iha tribunal, antes aplikasaun estadu emerjénsia, kada loron bele atinji prosesu 4 to’o 5 signifika kazu ne’e sei nafatin iha nia númeru aas, kompara ho krime seluk.

Ikus kona ba dadus provizóriu, ne’ebé iha antes tribunal sei realiza julgamentu ba prosesu normal sira hanesan konsege julga kazu VD hamutuk 142, no prosesu 100 resin mak termina. (Lee notísia seluk iha Diáriu Timor Post)

No More Posts Available.

No more pages to load.