João Choque: Abílio Mausoko Serve ba PAMD, “Dili Presiza Líder Influensia hodi Hakotu Problema Haat”

by -586 views
João Choque

Timor Post (11/01/2021)—João da Silva koñesidu ho naran rejisténsia João Choque ka João Bekora, apoiu tebes Abílio Mausoko ne’ebé partisipa mós iha kandidatu ba Prezidente Autoridade Munisípiu Dili (PAMD).

Choque dehan, kapitál nasaun ne’e presiza tebes líder ne’ebé iha influensia. No tuir nia, Mausoko serve.

Choque hatete, Mausoko la’ós ema foun ba juventude no populasaun sira liuliu iha Dili. Nia subliña, Dili nia problema la’ós de’it iha jestaun.

“Soko la’ós ema foun. Problema la’ós de’it kapasidade maneja maibé mós influensaun atu halo Dili laran ne’e disiplina uluk,” Choque afirma ba Timor Post.

Tanba ne’e, Choque dehan, pesoalmente nia apoiu tebes Mausoko nia partisipasaun iha kompetisaun ba PAMD no fi’ar katak Mausoko mak sei hetan konfiansa husi governu hodi asumi responsabilidade ida ne’e.

Nia hatutan, Mausoko iha vantajen boot ida hodi lidera Dili mós tanba nia iha istória rejisténsia ne’ebé merese duni i bele garante disiplina iha Dili.

“Figura ida ita presija atu labele de’it halo aprosimasaun seguransa lori halo disiplina maibé mós aprosimasaun seluk ne’ebé báziku ba istória. Ema Sira ne’ebé iha istória iha pasadu dala ruma ema hakarak rona i halo tuir,” Choque subliña.

Iha parte seluk, Choque mós hatete, Dili presiza tebes líder ida ne’ebé bele rejolve lalais ho matenek problema hamutuk haat (4) inklui problema lixu, harii uma arbiru iha sidade laran no mota ninin sira, okupante sasan estadu no aplika sistema retribuisaun atu garante utilizasaun fasilidade públiku sira ho di’ak liu.

“Pengelolaan sampah, hari uma arbiru, okupante sasan estadu sira, retribusi. Ha’u haree Soco bele,” Choque komenta.

Entretantu antes ne’e, entrevista ho Timor Post, Mausoko subliña, nia prontu asume responsabilidade ida ne’e tanba hanesan timoroan ho meius hotu fó kontribuisaun ba dezenvolvimentu iha Dili i ba Timor laran tomak.

“Karik governu fó responsabilidade ida ne’e, ha’u hanesan sidadaun prontu hela atu simu responsabilidade ida ne’e,” subliña juventude FRETILIN ne’ebé koñesidu tebes ko’alia iha palku iha kampaña eleisaun antesipada 2018.

Maske nune’e, líder antigu ida husi arte marsiál PSHT ne’e hatete, normalmente iha prosesu selesaun hanesan ne’e bele mós iha reklamasaun sira. Tanba ne’e, nia dehan, prosesu ne’e nakloke ba sé de’it mak iha reklamasaun ba nia rasik.

Entretantu Ministru Administrasaun Estatal (MAE) Miguel de Carvalho Pereira, informa, atualmente ekipa juri rekrutamentu ba administrador no prezidente autoridade sira liuliu iha Dili tama ona iha faze selesaun dokumentus no prepara ba teste eskrita.

“Agora komisaun juri iha ona faze ida atu fó sai lista definitivu ba kandidatu sira ne’ebé mak elijivel atu mai tuir prova eskrita, ne’ebé iha semana ida ka rua tan fó sai ona lista sira ne’e,” Ministru haktuir.

Enkuantu Timor Post kontinua husu, kandidatu ba Prezidente Autoridade Munsipiu Dili ne’e hamutuk ema na’in hira mak kompete, maibé nia parte hatan de’it katak labele fó sai tanba total nia lafiksu.

Maibé nia dehan, tuir lista ne’ebé mak antes ne’e nia hare, Abílio Mausoko mós tuir hotu kandidatura ba Prezidente Autoridade Munsipiu Dili ninia. (cao)

No More Posts Available.

No more pages to load.