Jestor sira Deside Muda Pasiente Moras Denge iha HNGV ba Vera-Kruz

by -298 views
Odete Maria Freitas Belo

Jornalista Jaime Pires / Editór Noémio Falcão

Dili (Timor Post)—Ministra Saúde (MS) Odete Maria Freitas Belo, haktuir, nia rasik reuniaun ona ho Diretór Servisu Saúde Munisípiu Dili, Diretór Ezekutivu HNGV deside muda pasiente ho moras denge ba Eis Sentru Saúde Vera Kruz ne’ebé durante ne’e uza ba izola pasiente moras daet COVID-19.

Odete dehan, desizaun ne’e foti tanba iha HNGV sala emerjénsia la sufisiente ona relasaiona ho númeru moras denge loron ba loron sa’e ba bebebeik.

“Ami deside ona Verra-Kruz ne’ebé mak prepara ba Covid-19 agora mamuk hela no mós konstrusaun ida iha sorin mamuk hela, entaun ami bele organiza hodi pasiente balun bele muda ba iha ne’ebá,” Governante ne’e subliña ba Jornalista sira, Kuarta (05/01/2022).

“Parte seluk ami haree la’ós pasiente de’it mak barak maibé ema ida ba hein ne’e mós barak, tanba ema ida moras nia família kuaze na’in haat ka lima hakarak tama hotu ba laran, entaun Diretor Jerál HNGV no Xefe Departamentu inklui médiku sira ajuda haree hanusa mak família ne’e labele barak demais,” Odete dehan.

Odete rekoñese agora surtu denge sa’e maka’as, tanba ne’e kada loron númeru kontinua aumenta no hamate ona ema lubun ida.

“Ita kuandu muda ona balun ba Verra-Kruz naturalmente ita sei presiza mós rekursu umanus, entaun sei halo mós rekrutamentu,” Nia esplika.

Nia mós husu ba komunidade tomak liuliu ba inan aman sira atu kontinua hamos uma oin liuliu vazu aifunan sira ne’ebé mak bee iha laran tanba susuk ne’e gosta tolun iha bee laran, tanba ne’e kada loron tenke hamoos, no iha uma laran liu-liu Ropa sira tara de’it ne’e tanba susuk gosta tabele.

“Entaun tenke hamoos uma ninian liuliu kalen att no tanki inklui vazu aifunan sira ne’e hodi susuk labele tolu iha laran, uma laran labele tara Ropa sira ne’e tanba nia gosta tabele iha sira ne’e, tanba susuk agora ne’e gosta tata iha tempu loron kalan laiha, entaun husi komunidade tomak no inan aman sira kuidadu an no kuidadu ita nia oan sira,” Nia hakotu.

No More Posts Available.

No more pages to load.