Jerasaun Patriota Deklara La Fó Apoiu ba Kualkér Kandidatu PR

by -379 views
Membru hosi jerasaun patriota halo deklarasaun la fo apoiu ba kualker kandidatu Prezidente republika, iha Sede Jerasaun Patriota, Farol, Kuarta (23/2), Foto TP/Mariano Abi

(Reportajen Mariano Abi/ Editor Mateus da Cruz)

Dili (Timor Post)- Tanba prinsípiu Jerasaun Patriota (JP) nian ne’ebé tane aas liberdade membru ida-idak nian atu ezerse sira-nia direitu ba partisipasaun polítika, nune’e Asosiasaun Jerasaun Patriota (JP), deklara sei la fó apoiu ba kualkér kandidatu Prezidente Repúblika (PR).

“Jerasaun Patriota hakarak fo sai no klarifika ba públiku katak nu’udar asosiasaun, Jerasaun Patriota la fó apoiu ba kualkér kandidatu ida, maibé nia respeita nafatin no tane aas liberdade membru ida-idak nian atu ezerse sira-nia direitu ba partisipasaun polítika ne’ebé garante husi artigu 46 Konstituisaun RDTL,” deklara Portavós Asosiasaun Jerasaun Patriota, Memensio Freitas iha Sede Jerasaun Patriota, Farol, kuarta (20/02).

Jerasaun Patriota nu’udar asosiasaun ka klibur ida ne’ebé halibur funu na’in nia oan sira, ho ninia vizaun no misaun rasik, atu hatutan hikas prinsípiu luta na’in sira nian, hodi liberta povu husi ki’ak no mukit no mós kontribui ba dezenvolvimentu nasaun ida ne’e nian ba jerasaun aban bainrua.

Asosiasaun Jerasaun Patriota harii bazeia ba artigu 43 Konstituisaun Repúblika ne’ebé garante direitu no liberdade sidadaun sira nian atu harii asosiasaun ruma no bazeia mós ba Dekretu Lei nú. 5/2005 kona-ba pesoa koletiva sem fim lukrativu.

Jerasaun Patriota observa iha ema individuál ka grupu ne’ebé pertense ba ekipa susesu kandidatu balun, fó-sai ona deklarasaun polítika ne’ebé lori ka temi kona Jerasaun Patriota nia apoiu ba Kandidatu Prezidensiál balun.

“Iha Asosiasaun Jerasaun Patriota ninia estatutu iha artigu 7 a liña 2, hatuur katak, JP ne’e organizasaun Asosiasaun ba apartidária, ne’e duni ninia membru sira livremente espalla iha partidu polítika hotu-hotu, maibé kuandu hamutuk ona iha sede ida ne’e nia okos, la koalia kona ba polítika no nem uza atributu partidu nian maibé nu’udar pesoál ou individual, iha ninia fatin ko’alia,” nia dehan.

Tanba ne’e, se iha tempu oin mai mak mosu tan deklarasaun ruma ne’ebé lori ka temi JP nia apoiu ba kandidatu ruma, deklarasaun hirak ne’e konsideradu nu’udar, deklarasaun individuál no la reprezenta JP hanesan asosiasaun.

Portavós JP husu ba membru sira hotu partisipa ho maturidade no konxiénsia tomak iha festa demokrasia ida ne’e hodi fó votu ba kandidatu tuir ida-idak nia desizaun polítika.

“Husu ba raan maluk sira hotu, atu ita hotu nafatin respeita naran ida-ne’e no hatuur nia iha ninia fatin loloos, signifika apoiu membru sira ba iha kandidatu ne’e ida-idak ho nia konsiensia la bolu organizasaun,” nia informa.

Antes atu hakotu, Portavoz informa ba membru JP sira atu respeita kandidatu hotu-hotu, evita deklarasaun insulta ruma hasoru kualkér kandidatu ida. (Lee notisia seluk iha jornal Timor Post/asesu youtube Timor Post)

No More Posts Available.

No more pages to load.