DILI (TIMORPOST.COM)—Asosiasaun HAK, apresia servisu Luçia Maria Brandão Freitas Lobato, nu’udar Koordenadora ba Grupu Traballu ba Reforma Setór Justisa, iha Timor-Leste.
Diretór Ezekutivu Asosiasaun HAK, Feliciano Araújo, hatete, progresu implementasaun setór justisa, HAK nota katak, hosi primeiru Governu mai to’o oitavu Governu halo ona buat lubuk ida. Klaru katak to’o iha oitavu Governu sira tenta ona oinsá maka bele iha formasaun lubuk ida ba iha Jurista, Advogadu no Prokuradór.
“Ita hare filafali ba kontestu Governu dasia nian, ita haree progresu di’ak ida maka, iha ona Koordenadora ba iha reforma setór Justisa, foin lalais ami (Sosiedade Sivíl) hasoru no ami dada lia uitoan ho Koordenadora Luçia Lobato, klaru katak nia dezenvolve relatóriu hatama ona ba Primeiru Ministru, nia iha planu di’ak oinsá maka kada tinan maizumenus bele rezulta ema na’in-50 ba iha setór Justisa ninian liuliu Juis, Advogadu, Defensór no Prokuradór,” Feliciano informa ba Timor Post Via-telefone, Domingu (19/11/2023).
Sosiedade Sivíl rekoñese progresu servisu hirak ne’ebé hatudu agora di’ak, maibé kestaun ida seluk ne’ebé Asosiasaun HAK tau iha nia konsiderasaun maka vontade, kometimentu, responsabilidade hanesan Juis, Advogadu no Prokuradór sira ne’e maka sei tau pregunta boot.
“Purezemplu ita haree ba iha, defensór públiku ninian, sira dedika sira nia an depois mandatu ne’ebé fó ba sira ne’e, hodi serve povu fó ba sira hanesan gratuita, maibé sentidu gratuita ida ne’e, dala-ruma hosi sosiedade rasik, liuliu komunidade baibain seidauk haree ninia signifikadu implementasaun ida ne’ebé maka di’ak ba iha komunidade”, nia hato’o.
Se sura sira nia servisu ne’ebé kontribui, sura hosi zero ba to’o iha 10, sira nia servisu foin maka hela ho valor 6 ka 7, valor seidauk sa’e másimu, purezemplu vontade ida, atu fó sira ninia asisténsia ba iha komunidade hirak ne’ebé sai vítima ba iha problema hanesan kazu sivíl la hare iha ne’ebá.
Antes ne’e, Koordenadora Grupu Traballu Reforma ba Setór Justisa (GTRSJ), Luçia Maria Brandão Freitas Lobato, hatete, programa tolu maka sai prioridade durante mandatu tinan liman. Programa tolu maka hanesan apoiu Governu promove no implementa Governu nian iha Area Justisa, prevee planu Estratéjiku Setór Justisa nian no inklui Dezenvolve proposta Polítika.
“Programa tolu ne’ebé sai prioridade ba nian ne’e, bazeia ba despaxu husi Primeiru Ministru, Kay Rala Xanana Gusmão, atu implementa ida ne’e”, nia dehan.
Ho pontu tolu ne’e, signifika katak, ba reforma ne’ebé sai programa prioritáriu ba Primeiru Ministru nia intende katak, importante tebes tenke tau matan entaun nia hamosu asuntu grupu traballu, tanba ne’e nia la depende ba Ministru Justisa, la depende ba Konsellu Ministru, mais diretamente ba iha Xefe Governu.
2,241 total views, 3 views today
Bele hare Video Seluk :
Subscribe to Timorpost
