DILI (timorpost.com)—Diretór Jerál Prevensaun Sensibilizasaun Komisaun Anti Korrupsaun (KAK), Rosario Saldanhã Araújo hatete, liga ba preokupasaun husi públiku nian katak sujere para taka tiha instituisaun KAK ne’e kompeténsia estadu no parlamentu.
“Atu taka instituisaun KAK ne’e, ha’u hanoin públiku no governu ida-idak iha nia ókulu atu hare instituisaun KAK nia efetividade no servisu di’ak ka la di’ak bele sukat no bele avalia liuhusi orsamentu ne’ebé aprova tinan-tinan fó mai iha KAK,”dehan Rosario ba Timor Post, Domingo (19/11).
Tuir nian, kada tinan KAK nia relatóriu sempre entrega ba iha parlamentu Nasionál, ida ne’e mak sai sasukat ida hodi hare para instituisaun KAK ne’e kontinua estabelese ka taka. Tanba servisu kombate korrupsaun ne’e la’ós loron-loron investiga ema ka kaer ba kastigu de’it ne’e lae, maibé tenke hare mentalidade karakter sosiedade hahú muda ona.
Diretór ne’e fó ezemplu falsifikasaun dokumentu ida menus ona iha ministériu sira no falsifikasaun nota sira menus iha loja sira, kombustivel estadu nian iha estasaun mina nian ema la ba enxe arbiru no karreta estadu reduz iha dalan-dalan, ida ne’e servisu Komisaun Anti Korrupsaun nian too iha ne’ebá.
Diretór hatete, KAK halo investigasaun no kazu lubuk ida ba tiha Ministériu Públiku, ezemplu iha tinan 2022 ate 2023 kazu 74, maibé kazu boot sira dala ruma publika, maibé kazu ki’ik sira balun ba tama kadeia ne’e la sura.
“Tanba ne’e, ba ami lakohi atu fó komentáriu de’it, ami hakarak ita sukat ho preparasaun mais realistiku ho dadus bele sura buat sira ne’e,” Hateten Diretór Prevensaun.
Alende ne’e nia haktuir, Instituisaun KAK ne’e hari ho independente no lei fo dalan halo knaar ne’e ho independente, maibé públiku sira preokupasaun hakarak tutela ba iha Ministériu Públiku ne’e di’ak no la problema.
“Harii KAK ne’e, tanba ratifika komisáriu ONU nian liuhusi Parlamentu Nasionál rezolusaun númeru 25/2008, ita hatudu ba nasaun tomak iha Mundu dehan ita mós estadu parte ida kombate korrupsaun iha ita nia nasaun. Tanba ne’e, atu taka KAK ne’e estadu mak iha kompeténsia liu atu taka ka loke, estadu mak tenke avalia instituisaun KAK, maibé preokupasaun husi Públiku ne’e hato’o persepsaun ne’e normal hela, maibé ida kompeténsia liu ne’e parlamentu Nasionál no estadu” katak nian.
324 total views, 3 views today
Bele hare Video Seluk :
Subscribe to Timorpost
