DILI, (timorpost.com)— Emiliano M. Pesoa, Timoroan ida ne’ebé sai vensedór Karreta Rush ida iha sortéiu Mie Sedaap 2023, husi empreza Ocean Line, Lda nu’udar distributór dahuluk Mie Sedaap iha Timor-Leste.
Atividade Sortéiu ka dada rifa ne’e realiza iha Timor Plaza, Sábadu kalan 18 fulan-Novembru 2023 hahú husi tuku 19:30 to’o tuku 23:45 kalan.
Komisaun Organizadora iha atividade ne’e husi empreza Ocean Line, no dada rifa ba prémiu oioin hahú husi rifa ba Vintuñas, Televizaun, Motorizada, ikus liu mak Karreta Rush ida.
Hafoin manajer Ocean Line Lda, Karel Guterres Ultomo, entrega simbólikamente xave karreta Rush foun nu’udar prémiu topu ka prémiu ás liu iha sortéiu Mie Sedap 2023, ba manán nain, Emilio M. Pesoa, ho kontente informa ba Timor Post, hatete manán karreta nu’udar sorte boot ne’ebé hetan iha tinan ne’e.
“Ha’u sente kontente tebes ba prémiu ida ne’ebé ohin kalan ha’u hetan, tanba ida-ne’e la’os buat ida servisu todan, maibé tan de’it halibur plástiku falun Mie Sedaap nian hatama, ha’u hetan prémiu karreta, ne’ebé ha’u kontente”, Manan Na’in premíu Karreta Rush, Emiliano, informa ba Timor Post, hafoin simu xave karreta husi empreza Ocean Line Lda, iha Timor Plaza, Sábadu-kalan, (18/11/2023).
Esforsu ne’ebé nia halo to’o hetan karreta mak sosa plástiku falun Mie Sedaap ne’ebé labarik sira hili loron-loron iha fatin lixu, depois tau envelope hatama ba kaixa ne’ebé distributór Mie Sedaap prepara ona iha Dili laran. Tanba ne’e nia agradese ba empreza Ocean Line no husu kontinua atividade refere para enkoraza Timoroan para bele hetan mós prémiu.
“Ami fó agradese barak tebes-tebes ba empreza distributór Mie Sedaap, atu kontinua programa dada rifa ne’e iha tinan oin mai halo nafatin para povu Timor bele asesu hotu. Amplop ida ha’u tau Mie Sedaap nia falun 5, ne’ebé ha’u konta 400 amplop maka ha’u hatama iha kaixa sira iha Dili laran ne’e ami hatama hotu”, Emiliano esplika.
Emiliano nu’udar dezempregu ida ne’ebé durante ne’e servisu tuir de’it projetu sira bainhira iha, bainhira laiha mak nia halimar de’it iha uma, tanba ne’e ho prémiu ne’e nia sente kontenti no orgullu bele manán karreta.
Nia hatete maske nia la hatene lori karreta maibé nia sei uza tanba karreta ne’e nu’udar lembransa ida husi Mie Sedaap ba nia família.
Iha fatin hanesan Manajer Distributór Mie Sedaap, Empreza Ocean Line, Karel Guterres Ultomo, hatete, programa dada rifa ba Mie Sedaap ne’e nia kompañia mak organiza tanba empreza ne’e mak sai distributór Mie Sedaap dahuluk no ida de’it iha Timor-Leste.
“Tinan ida-ne’e 2023, marka 20 anos ami sai distributór ba Mie Sedaap, ne’ebé buat ida ba ami orgullu tebes, familia tomak uma-kain sira iha teritóriu Timor laran, bele simu marka Mie Sedaap iha sira-nia uma laran, husi Avó to’o oan sira no labarik ki’ik han hotu Mie Sedaap, ida-ne’e ami kontente tebes”, Manajer Ocean Lines, Karel Guterres, hatete.
Atividade hanesan mós realiza ona ba datoluk antes Covid no paradu iha tian 2020, 2021 no 2022, foin kontinua hikas iha 2023, tanba ne’e, nia espera katak sortéiu ida-ne’e sei kontinua ba tinan hirak tuir mai hodi fó ba manán nain sira.
“Ami espera katak ida-ne’e la’ós dala ida de’it, foin daudauk Covid ne’e maka ami para tinan tolu, ne’ebé ami espera katak tinan-tinan ami bele halo eventu hanesan ne’e, maske prémiu la boot hanesan ne’e mas ki’ikoan mós ami sempre halo nafatin”, Karel Guterres, esplika.
Nu’udar jestora empreza Mie Sedaap nafatin agradese tanba ho kontribuisaun Timoroan tomak nian mak empreza ne’e hamriik metin iha Timor-Leste.
Iha eventu dada rifa ne’e, prémiu ne’ebé empreza Ocean Line sai distributór úniku ba Mie Sedaap iha Timor-Leste fó manán nain sira mak hanesan Vintuñas 12, Televizaun 12, Motorizada Beat 3, no Karreta ida. Kustu ba prémiu hirak ne’e hamutuk rihun $30 USD. (*)
3,315 total views, 15 views today
Bele hare Video Seluk :
Subscribe to Timorpost
