Dili (Timorpost.Com)—Institutu Nasionál Kombate SIDA (INCSIDA-Sigla Portugés), iha nia estratéjia rasik hodi kombate tranzmisaun virus HIV/SIDA.
Prezidente sesante Institutu Nasionál Kombate HIV/SIDA, Atanásio de Jesus, informa Institutu Nasionál kombate presiza iha nia estratéjia rasik oinsá eduka ema hasae sira nia kapasidade sosializa informasaun ba komunidade ligadu ho tranzmisaun virus HIV/SIDA.
“Agora daudauk Institutu Nasionál Kombate HIV/SIDA iha ona planu estratéjia no agora daudauk iha ona gabinete Primeiru Ministru (PM) hein de’it atu aprovasaun”. Nia dehan ba Jornalista sira iha Palasiu Governu, Kinta (21/09).
Nia haktuir, se bainhira Prezidente eleitu hakarak implementa planu estratéjia ne’ebé iha tinan lima oin mai sei halo redusaun ida ne’ebé di’ak no furak.
Iha fatin hanesan, Vise-Primeiru Ministru (V-PM) no Primeiru-Ministru (PM) Interinu Mariano Assanami Sabino fó posse ba Daniel Marçal hodi lidera hikas Institutu Nasionál Kombate (INK) HIV-SIDA ba mandatu períodu ida hodi troka Prezidente sesante Atanasio de Jesus.
Tanba ne’e, V-PM husu ba Prezidente foun atu hala’o servisu ho másimu hamutuk ho funsionáriu hotu atu bele halo prevensaun ba moras HIV iha Timor-Leste.
“Ita-boot sira mantein nafatin koordenasaun ho Ministériu Solidaridade, Ministériu Saúde no Ministériu Edukasaun tanba ministériu tolu ne’e iha ligasaun ho servisu Institutu ne’e nian, koordena malu di’ak ho funsionáriu hotu atu halo servisu ne’ebé másimu hodi halo prevensaun ba moras ne’e”, Assanami dehan iha nia intervensaun bainhira fó posse ba Prezidente foun iha Palásiu Governu, kinta ne’e.
Iha okaziaun ne’e, Prezidente foun Daniel Marçal hatete, mandatu ida ne’e mak servisu makas ho parte hotu atu halo prevensaun ba moras HIV-SIDA iha Timor-Leste.
“Prioridade mak oinsa atu halo prevensaun ba moras ne’e, kria estratejia ne’ebé simples para ema bele kompriende, koopera ho instituisaun relevante sira hotu povu hotu atu prevene moras ne’e iha ita-nia nasaun”, Daniel dehan.
Tui nia, ema barak kona moras HIV tanba la iha koñesimentu no barak afeita ba moras ne’e subar aan hodi lakohi hakbesik ba ospitál no klínika sira hodi halo tratamentu.
“Tanba ne’e planu estratéjia ne’e importante tebes hodi muda koñesimentu ema nian atu bele koñese risku husi virus HIV-SIDA oinsá mak atu bele kombate no prevensaun kona ba virus refere”. Nia dehan.
Planu estratéjia ne’e la dook husi Planu Ministériu Saúde (MS) nian no Organizasaun Internasionál no Nasionál sira ne’ebé mak durante ne’e implementa ona oinsá mak atu kombate no prevensaun ba virus HIV-SIDA.
Planu ida ne’e, Institutu nasionál Kombate HIV/SIDA, servisu hamutuk ho Ministériu Solidariedade Sosiál (MSSI), Ministériu Saúde (MS). Planu estratéjia ne’e sai fondasi ba programa ne’e mak Ministériu Saúde (MS) rasik.
1,157 total views, 45 views today
Bele hare Video Seluk :
Subscribe to Timorpost
