ERMERA (timorpost.com) – Hafoin hein durante tinan barak nia laran, ikus mai Sarani sira iha suku Catrai Caraik, Postu Administrativu Letefoho, munisípiu Ermera, iha ona Kapela foun.
Inaugurasaun ba Kapela ne’e, ofisialmente husi Bispu Kardeál Timor-Leste, Sua Eminénsia Dom Virgílio Kardeál do Carmo da Silva, SDB, no Vise Ministru Administrasaun Estatál, Jacinto Rigoberto reprezenta Ministru MAE, Tomás do Rosário Cabral, akompaña husi Amu Pároku no Amu Vigáriu.
Kapela ne’e konstrui iha tempu susar, bainhira povu hasoru perigu ba nia moris, tanba Covid-19 tama Timor-Leste. Maibé, tanba iha fiar boot ba Na’i-Maromak, biar situasaun difisil, no hetan suporta husi Kay Rala Xanana Gusmão no Jose Ramos Horta, bele realiza mehi ne’e.
“Ita nia Povu no komunidade iha postu Letefoho, no liu-liu komunidade iha suku Catrai Caraik, ohin sente orgullu. Tanba prezensa Kapela foun iha sira nia suku,” Vise-Ministru Administrasaun Estatál, Jasinto Rigoberto dehan ida ne’e durante nia diskursu iha suku Catrai Caraik, postu Letefoho, Ermera, Segunda – feira (06/08/2023).
Ho prezensa Kapela foun ne’e hanesan prezente furak ne’ebé fó motivasaun ba sarani Kristaun Katólika iha Ermera, atu sai sarani di’ak hodi kumpre ba Misa loron-loron. Tanba, Igreja Katólika mak nu’udar matadalan ba povu Timor-Leste nia fiar,
“Governu ne’e sempre kontinua servisu hamutuk, hodi dezenvolve povu. Nune’e bele kontribui ba bem komún ema hotu nian,” Vise Ministru afirma.
Marka mós prezensa iha inaugurasaun Kapela ne’e, Padres, Madres, autoridade lokál postu Letefoho, sarani no povu Letefoho.
2,140 total views, 3 views today
Bele hare Video Seluk :
Subscribe to Timorpost
