Dili (timorpost.com)—Eskola sai hanesan sentru aprendizajen ba labarik sira hodi duni sira nia mehi ba futuru, Maske defisiente maibe labele lakon oportunidade aprende.
Hato’o husi Fredi Soares, idade (17), hanesan estudante ida ne’ebé defisiénsia ain, ba jornalista TP iha Eskola 10 de Dezembru, Segunda (05/06).
Objetivu Fredi eskola tanba hakarak sai pintór, no mós hakarak aprende kona ba lee, hakerek no konta.
“Ha’u hakarak eskola tanba, hakarak sai pintór no mós lee, hakerek no konta hanesan mós kolega seluk”
Nia haktuir, Agora daudaun iha klase sete ano, turma C. loron-loron nia ba eskola uza kursi roda, hetan ajuda husi kolega sira husi fundasaun AHISAUN.
Fundasaun AHISAUN hanesan sentru ida ne’ebé lokaliza iha Fatuhada, Postu Dom Aleixu, Munisípiu Dili, objetivu hodi akumula ema ho defisiénsia sira. Fatin ne’e responsavel husi padre Adriano Ola Duli, hanesan prezidente Fundasaun AHISAUN.
Kona ba responsabilidade eskola no fatin padre iha Fundasaun AHISAUN ho família servisu hamutuk husi parte finansiál nian.
Husik ki’ik kedas iha mehi hakarak sai pintór, la iha obrigasaun ou motiva husi ema seluk, tanba ne’e maski ho status defisiénsia maibé nafatin optimizmu hodi atinje mehi atu sai pintór iha futuru. Nia konta.
Mensajen ba kolega defisiénte sira hotu katak, eskola sai hanesan knua aprendizajen hodi hadi’a moris iha futuru, tanba ne’e labele lakon oportunidade atu aprende hodi hadi’a mehi sira ne’e ita rasik hakarak eziste iha moris tuir mai. Moris la’ós atu kompete, maibé moris presiza aprende hodi hatene atu bele muda moris.
“Defisiénsia la sai barreira ida hodi hakloot ita nia mehi, maibé bainhira ita nafatin iha prinsípiu atu nafatin aprende mak futuru sei sai resposta iha ita nia moris. Atu hadi’a moris la mai husi milagre, maibé mai husi aprende, dixiplina buka aprende, tanba ne’e labele lakon oportunidade aprende”. Nia hateten.
825 total views, 6 views today
