DILI-Funsionáriu sira hosi Autoridade Munisípiu Dili (AMD) hamutuk ho estudante sira hosi Universidade Nasionál Timor Lorosa’e (UNTL), Fakuldade Medisina hamoos baleta kuak hodi redús moras dengue.
Prezidente ezekutivu Asosiasaun Saúde Munisípiu Dili, Manuel Francisco, esplika, halo limpeza jerál ho objetivu atu redús lixu iha sidade Dili sai ambiente ne’ebé moos no seguru atu nune’e moras labele hada’et ba komunidade.
“Ami hamutuk ho AMD hodi halo limpeza jerál iha area kampus UNTL nian to’o iha edifísiu Ministériu Saúde nian no limpeza iha dalan públiku hodi ra’ut fo’er ne’ebé naklekar iha dalan, ami foti tau iha saku hodi tau iha lixu fatin atu nune’e ekipa servisu saneamentu bele lori ba tau iha Tibar”, Manuel hateten ba Timor Post iha Kaikoli, Sábadu (18/03).
Nia hatutan, objetivu husi limpeza jerál ne’e hodi hadook-an husi moras dengue ne’ebé rejistu iha sentru saúde no postu saúde númeru sa’e aas tebes no mós moras kulit diária no inspesaun respiratóriu.
Nia dehan, husi limpeza jerál ida ne’e mak bele redús no elimina epidemolojia husi moras oi-oin liuhusi prevensaun mak limpeza jerál iha bairru ida-idak atu elimina moras dengue iha futuru.
Tuir doutór ne’e, moras dengue iha nia implikasaun mak kona-ba labarik idade tinan ida nia saúde umana ba leten bele estraga ema nia vida no mós estraga ekonómikamente. Ho problema hirak ne’e mak AMD no estudante medisina jerál iha inisiativa halo limpeza ida ne’e hodi redús moras dengue iha komunidade nia leet.
Nia haktuir, atu prevene moras dengue la’ós liuhusi ai-moruk de’it, maibé liuhusi limpeza hamoos bee dalan atu nune’e susuk labele hela tolun lori moras ba komunidade sira.
Aleinde ne’e mós halo sosializasaun no lori ai-moruk ba rega iha komunidade sira nia uma hodi prevene moras dengue labele hada’et ba ema seluk.
Nia hatete nia parte preokupa ho sidadaun balun laiha konxiénsia soe fo’er arbiru, iha fatin públiku no iha tempu udan kontribui ba inundasaun no kria mós moras oi-oin ba komunidade liuliu labarik idade ki’ik.
Iha fatin hanesan, prezidente Autoridade Munisípiu Dili, Guilhermina Filomena Ribeiro, hatete, AMD servisu hamutuk ho servisu saúde munisípiu Dili no estudante medisina jerál UNTL hodi limpeza jerál iha dalan públiku hodi prevene moras oi-oin no redús lixu iha sidade Dili.
Tanba ne’e husu ba komunidade sira uza konxiénsia tau fo’er ne’ebé imi produs tau iha lixu fatin atu nune’e pesoál saneamentu munisípiu Dili kontrolu iha terenu ra’ut lori ba soe lixu Tibar hodi labele lori moras ba komunidade sira ne’ebé hela besik.
Limpeza ne’e importante tebes ba ema hotu atu moris iha ambiente ne’ebé saudavel no hadook an husi moras oi-oin tanba agora tempu lori moras oi-oin liuhusi ne’ebé nakonu iha barrajen no iha dalan públiku sira.
Tanba ne’e, nia husu, komunidade atu tau fo’er iha lixu fatin ne’ebé estadu prepara ona atu nune’e pesoál saneamentu sira ra’ut hodi lori ba tau iha lixu Tibar hodi nune’e bele hadook-an husi moras oi-oin no hadook no prevene inundasaun iha tempu udan.
863 total views, 6 views today
