Dili (timorpost.com) — Sekretariadu Tékniku Administrasaun Eleitorál (STAE), Tersa, (07/03/2023), hala’o enkontru ho reprezentante partidu polítiku 24, ne’ebé tama iha lista eleisaun, atu prepara fiskais ba eleisaun Parlamentár (Elpar) 2023.
Iha ámbitu ne’e, Diretór Jerál Sekretariadu Tékniku Administrasaun Eleitorál (STAE), Acilino Manuel Branco, fahe informasaun kona-ba preparasaun sira ne’ebé durante ne’e STAE prepara ona tuir kalendáriu ne’ebé aprova ona.
“Enkontru ida ne’e realiza ho nia intensaun atu fahe informasaun ba partidu polítiku sira ba preparasaun fiskais, iha ne’e mós ha’u bolu diretór munisípiu sira mai atu rona informasaun balu molok realiza eleisaun parlamentár”, nia hateten iha salaun enkontru STAE Kaikoli.
Iha biban ne’e, Acelino, mós husu ba partidu polítika sira atu implementa formasaun ba fiskais partidu sira nian, no mós kolokasaun fiskais reprezenta partidu nian iha terenu atu bele kolabora iha eleisaun ne’e bele la’o ho di’ak.
Tanba STAE hala’o knar nu’udar órgaun eleitorál hodi implementa, superviziona no monitoriza lala’ok Eleisaun. Nune’e, nia husu sidadaun hotu atu apoiu órgaun eleitorál.
Maneira sira ne’e STAE tenke halo atu orienta partidu polítiku sira hotu hodi kontribui ba prosesu ElPar tinan ida ne’e bele hetan susesu ho integridade no responsabilidade.
“Ami haree katak ita tenke prepara antes, iha filozofia ida hatete “Siapkan payung sebeleum hujan” tanba ami haree ho númeru fiskais boot dalan-ruma ita boot sira laiha tempu atu halo preparasaun kuandu laiha informasaun antes”, Acelino hateten.
Fiskais sira ne’ebé prepara husi STAE sei koloka ba sentru votasaun sira iha territóriu timor laran inklui iha nasaun diaspora sira.
Iha enkontru refere hetan partisipasaun direita husi, Diretór STAE nasionál, diretór munisipál, reprezentante partidu polítiku-24, inklui ofisial STAE sira.
1,842 total views, 3 views today
Bele hare Video Seluk :