DILI- Relasiona ho filmazen ida viral iha sosiál media, Médiku feto ida ho initial ZO, simu subornu hosi Timoroan hirak ne’ebé ba hasai teste saúde, kazu refere komete hosi asesor balun nia espoza, hare ba kredibilidade HNGV nian, estrutura deside demite no hapara hosi atividade servisu.
Diretór Klínika HNGV, Marcelino Correia, informa relasiona ho filmazen ida ne’ebé viral iha sosiál media, kona-ba pesoal saúde nian ne’ebé komete aktu sobornu , kazu ida ne’e estrutura entrega ona ba parte justisa, iha ne’ebá orsida justisa mak sei termina tuir lei ne’ebé mak vigora ona.
“Ne’ebé agora, ita hapara nia husi servisu atendimentu, depois ita mós prepara hela ekipa ospital nian atu halo internal audit ba sira, depois hotu tiha prosesu ne’e ita hotu hatene ho faktu video entaun ita entrega ba parte justisa mak bele kondena,” Marcelino hato’o informasaun hirak ne’e ba Timor Post iha HNGV Sâbadu (04/03).
Tanba ne’e ema hothotu hamrik iha lei nia okos, iha ne’ebá mak lei mak sei hatete nia sala ka la sala, ne’e depende ba justisa, se nia halo ka komete subornu ne’e tuir nia Konxiensia raik ka lae, ida ne’e lei mak sei kordena.
“Ami hanesan jestor ba ospitál, ami nafatin asegura, kazu ida ne’e labele akontese tan, mezmu tempu ami hapara pesoál saúde ne’e hosi nia servisu kona-ba atendimentu medical check up, no prosesu tomak ami entrega ba iha justisa,” nia hato’o.
Marcelio afirma, buat ida naran subornu no abuat ida aktu korrupsaun ne’e akontese iha kualker iha fatin ne’ebé dei’t, tantu instituisaun Estadu, kuandu hanesan ne’e hamonu kredibilidade ba instituisaun refere.
“Tanba ne’e intermus instituisaun nia papél maka ne’e, nafatin kolabora ho parte justisa nian atu bele hala’o justisa ba iha nia, hosi parte ita nian ita hapara nia husi servisu ne’ebé mak nia hala’o atendimentu ba,” nia hakotu.
Alende ne’e fonte prinsipal hosi ospitál Nasionál Guido Valadares, konta, pesoál saúde ne’e nia hala’o atividade iha medical chek up nian, nia saláriu boot, seidauk sura ho servisu part time, pesoál saúde ne’e mós nia kaben mós servisu hanesan asesor iha fatin importante balun.
3,935 total views, 6 views today
