DILI (timor post.com) — Inséndiu ahi han Uma Mean Karantina Tasi-tolu, daudauk ne’e hela de’it ona akudesan ho besi metan.
Tuir observasaun Timor Post, iha fatin akontesimentu, Sábadu (04/03/2023), uma boot harii iha tempu Indonézia, ne’ebé durante ne’e sai fatin mahon ba komunidade kuaze família 50 resin iha laran, nakfilak sai fatin fuik tanba kauza husi ahi han.
Komunidade sira hela iha uma ne’e kuaze tinan 17, hakarak lakohi tenke muda husi fatin refere.
Maski laran triste, maibé ho akontesimentu Inséndiu ne’e obriga sira sai husi fatin ne’e ho urjénsia.
Vítima kuaze 50 resin hetan tulun husi estadu, inklui lider karizmátiku Xanana Gusmão, evakua kedas vítima sira ba iha fatin seguru edifísiu Bombeiru Malinamuk Komoro, hafoin kontinua aloka ba uma temporal Bairru-Pite.
Daudauk uma fatin ahi han, hela de’it akudesan ho besi metan ne’ebé hamaluk de’it ho manu fuik nia lian, asu maka la’o ba mai iha laran.
Posibilidade uma fatin ne’e sei labele harii tan, tanba vítima sira kuaze família 50, balu ba hela ona ho família, balu Governu aluga uma sira hela, balu hela nafatin iha uma temporal Bairru-Pité, Palasiu Prezidensiál kotuk hodi hein desizaun Governu nian.
To’o notísia ne’e tun, uma antigu husi tempu Indonézia, ne’ebé durante tinan 17 sai fatin mahon ba komunidade, Governu seidauk foti desizaun atu nakfilak ba saida, konstroi fali ka husik de’it seidauk iha desizaun ruma.
2,013 total views, 3 views today
Bele hare Video Seluk :
Subscribe to Timorpost
